सामाजिक सद्भाव कायम कैना सक्कु पक्षसँग इन्सेकके आग्रह
पहुरा समाचारदाता
धनगढी, १६ सावन । सुनसरीके देवानगञ्ज गाउँपालिका ओ सिरहाके गोलबजार नगरपालिकामे हुइल हिंसात्मक घटनाप्रति गम्भीर चिन्ता व्यक्त करटी सामाजिक सद्भाव कायम कैना इन्सेकस सक्कु पक्षसँग आग्रह करले बा ।
इन्सेकके अध्यक्ष विजयराज गौतमसे सावन १५ गते जारी विज्ञप्तीमे सुनसरीके देवानगञ्ज गाउँपालिकामे सावन १० गते रात दुई समूहबीच हुइल झडप नियन्त्रणके क्रममे सुरक्षाकर्मीके गोली लागके दुई जानेक मृत्यु हुइल रहे । २२ जाने घाहिल हुइल उल्लेख करल बा । ओस्टे, सिरहाके गोलबजार नगरपालिका–४ क्याम्पस चोकमे सावन १४ गते प्रदर्शनकारी ओ सुरक्षाकर्मीबीच हुइल झडपमे क्रममे गोली लागके औरही गाउँपालिका–२ तुलसीपुरके १८ वर्षीय गणेश यादवके मृत्यु हुइल तथा धनुषाके १९ वर्षीय सुवास ठाकुर घाइते हुइल विज्ञप्तिमे जनाइल बा ।
मधेश प्रदेशके टमान जिल्लामे हुइल आगजनी, तोडफोड तथा हिंसात्मक घटनाप्रतिफे विज्ञप्तिमे गम्भीर चिन्ता व्यक्त करल बा । विज्ञप्तिमे सक्कु राजनीतिक दल, समुदायके अगुवा, धार्मिक तथा सामाजिक नेतृत्व, नागरिक समाज, सञ्चारमाध्यम तथा आम नागरिकहे संयमता अपनैना, अपुष्ट ओ भ्रामक सूचना सम्प्रेषण नैकैना तथा कौनोफे समुदायबीच वैमनस्य फैलैना अभिव्यक्ति ओ गतिविधिसे दुर रना आग्रह करल बा । साथे आपसी संवाद, सहिष्णुता ओ कानुनी प्रक्रियामार्फत समस्या समाधान कैना सामाजिक सद्भाव कायम कैनोफे विज्ञप्ति मार्फत इन्सेकसे आह्वान करले बा ।
देवानगञ्ज ओ गोलबजारके घटनामे सुरक्षाकर्मीसे अत्यधिक बल प्रयोग करल विषय सार्वजनिक हुइल ओरसे घटनाके निष्पक्ष, स्वतन्त्र ओ प्रभावकारी अनुसन्धान कैना इन्सेकसे माग करले बा ।
