लागुऔषध सहित आठ जाने पक्राउ
पहुरा समाचादाता
धनगढी, १७ सावन । कैलाली ओ कञ्चनपुरके अलग अलग ठाउँसे अवैध लागुऔषधसहित आठ जाने पक्राउ परल बटै ।
गोदावरी न.पा.९ सेहरी स्थित भिटर सडक खण्डसे अवैध लागुऔषध खैरो हेरोइन २ ग्राम ५६० मिलिग्राम ओ नगद रु.३५ हजार ३ सयसहित २ जनहनहे शनिच्चर दुपहर प्रहरी पक्राउ करले बा ।
पक्राउ परुइयामे उहे न.पा.८ “झ” गाँउ बैठना बर्ष ३० के अशोक चौधरी ओ बर्ष २४ के दिपक चौधरी रहल बटै । गोप्य सुचनाके आधारमे इलाका प्रहरी कार्यालय मालाखेती, कैलालीसे खटल प्रहरी चेकजाँच करेबेर उ पदार्थ फेला पारके उ पदार्थ सहित पक्राउ करले बा ।
ओस्टेक करके, जिल्ला कैलाली धनगढी उ.म.न.पा.१० घुँइयाघाटसे अवैध लागुऔषध खैरो हेरोइन १७१ मिलिग्राम सहित उहे ठाउँ बैठना बर्ष ३० के सञ्जय रानाहे शनिच्चर साँझ प्रहरी पक्राउ करले बा ।
जिल्ला प्रहरी कार्यालय कैलालीसे खटल प्रहरी शंका लागके चेकजाँच करेबेर उ पदार्थ फेला पारके उ पदार्थ सहित पक्राउ करल बा ।
ओस्टेक करके जिल्ला कैलाली टिकापुर न.पा.९ खक्रौलासे अवैध लागुऔषध खैरो हेरोइन ३ ग्राम ३५० मिलिग्राम सहित जिल्ला बर्दिया, राजापुर न.पा. ५ पाहाडीपुर बैठना १८ बर्षिय २ जाने किशोरहे शनिच्चर साँझ प्रहरी पक्राउ करले बा । प्रहरी चौकी कालाकुण्डा, कैलालीसे खटल प्रहरी शंका लागके चेकजाँच करेबेर उ पदार्थ फेला पारके उ पदार्थ सहित पक्राउ करले बा ।
ओस्टेक करके, जिल्ला कैलाली टिकापुर न.पा.९ खक्रौला स्थित सत्ती भन्सार कार्यालय लग्गेसे अवैध लागुऔषध खैरो हेरोइन ६० मिलिग्राम सहित २ जनहनहे शनिच्चर साँझ प्रहरी पक्राउ करले बा । पक्राउ परुइयामे उहे न.पा.१ ब्लक नं. १० बैठना बर्ष ३१ के हिमाल रावल ओ लम्कीचुहा न.पा.३ बैठना बर्ष ४० के राकेश गुरुङ रहल बटै । इलाका प्रहरी कार्यालय टिकापुर, कैलालीसे खटल प्रहरी शंका लागके चेकजाँच करेबेर उ पदार्थ फेला पारके उ पदार्थ सहित पक्राउ करले बा ।
ओस्टेक करके कञ्चनपुर दोधारा चाँदनी न.पा.१ पशुपति टोलसे अवैध लागुऔषध खैरो हेरोइन ४०० मिलिग्राम सहित उहे ठाँउ बैठना १८ बर्षिय किशोरहे शनिच्चर रात प्रहरी पक्राउ करले बा । इलाका प्रहरी कार्यालय दोधारा चाँदनी, कञ्चनपुरसे खटल प्रहरी शंका लागके चेकजाँच करेबेर उ पदार्थ फेला पारके उ पदार्थ सहित पक्राउ करले बा । यी सम्बन्धमे प्रहरी आवश्यक अनुसन्धान करटी रहल बा ।
