कैलारी गाउँपालिकामे बनल १५ शैय्याके अस्पताल सञ्चालनमे
पहुरा समाचारदाता
धनगढी, २१ सावन । कैलाली जिल्लाके कैलारी गाउँपालिका वडा नम्बर ५ बैसपुरमे बनल १५ शैयाके अस्पताल संचालनमे आइल बा ।
संघीय सरकारके नीति अनुरूप बनाइल उ अस्पताल बुधके रोजसे संचालनमे आइल हो । कैलारी गाउँपालिका अध्यक्ष राजसमझ चौधरी उ अस्पतालके विधिवत रुपमे उदघाटन करल रहिट । अस्पताल उदघाटन कार्यक्रममे सम्बोधन करटी यी संचालनमे अइलेसेफे यिहीहे दिगो रुपमे लैजाइक लाग सक्कु जानेक सहयोग अपरिहार्य रहल बटैलै ।
स्थानीय सरकारके बजेटसे केल्ह संचालन करेनैसेक्ना ओरसे प्रदेश, संघ सरकारसंगे सक्कु राजनीतिक दल ओ यहाँके स्थानीयके सहकार्य हुईपर्ना बटैलै । अस्पताल निर्माणके लाग जग्गा उपलब्ध कराइल बैसपुरबासीहुकनहे धन्यवादफे ज्ञापन करलै ।
कार्यक्रममे कैलारी गाउँपालिकाके प्रमुख प्रशासकीय अधिकृत दलबहादुर धामी अस्पताल संचालनमे आइलपाछे स्थानीयहुकनहे बहुट जैसिन सेवाके लाग आब धनगढी जाई नैपर्ना बटैलै ।
कार्यक्रममे नेपाली काँग्रेस कैलारी गाउँपालिका सभापति कृष्ण प्रसाद चौधरी जे जहाँ बटी उहेसे सहयोग करलेसे यी अस्पतालहे दिगो बनाई सेक्ना बटैलै । नेकपा एमालेके कैलारी गाउँपालिका अध्यक्ष गणश प्रसाद चौधरी, नेपाली कम्न्यूष्ट पार्टी कैलारी गाउँपालिका अध्यक्ष बतासु चौधरी, रास्वापा कैलारी गाउँपालिका उपाध्यक्ष कविता चौधरी, नाउपा कैलारी गाउँपालिका अध्यक्ष भीष्म चौधरी, राप्रपा कैलारी गाउँपालिका अध्यक्ष नेपालु चौधरीलगायतसे अस्पताल संचालनसंगे गुणस्तरीय सेवा प्रदान कैना आग्रह करलै ।
वडा नम्बर ५ के वडा अध्यक्ष विष्णु प्रसाद चौधरीके अध्यक्षतामे हुइल कार्यक्रममे स्वागत मन्तव्य तथा अस्पतालसे प्रदान कैना सेवाबारे कैलारी गाउँपालिका स्वास्थ्य शाखा प्रमुख नरेश कुमार चौधरी जानकारी डेहल रहिट । कार्यक्रम संचालन कैलारी गाउँपालिका सामाजिक विकास शाखा प्रमुख यगम कलेल करल रहिट ।
यिहे निर्माण कम्पनी रोयल कन्स्ट्रक्सन जेभीके प्रमुख प्रकाश सेटठी ओ अस्पताल संचालनके लाग जग्गा प्रदान करुइया बैसपुर बासीहुकन प्र्रमाणपत्र सहित सम्मान कैगिल बा । मुलुकके प्रत्येक पालिकामे १५ शय्याके अस्पताल सञ्चालन कैना नेपाल सरकारके नीति अनुरूप २०७० अनुसार २९ गते ठेक्का सम्झौता करके वडा नम्बर ५ के बैसपुरमे अस्पताल भवन निर्माणके काम आघे बढाइल रहे । भ्याटसहित १८ करोड ५२ लाख रुपियामे रोयल कन्स्ट्रक्सन जेभीसे अस्पताल बनैले बा ।
