बाल भेलाके प्रगती तथा समिक्षा बैठक सम्पन्न

पहुरा समाचारदाता
धनगढी, २१ सावन । कैलारी गाउँपालिकामे बाल भेलाके प्रगती तथा समिक्षा बैठक सम्पन्न हुइल बा ।

बाल कल्याण संघके आयोजनामे कैलारी गाउँपालिकाके समन्वय ओ वल्ड भिजन इन्टरनेशनल नेपालके सहयोगमे बाल भेलाके प्रगती तथा समिक्षा बैठक हुइल हो ।
गाउँपालिका उपाध्यक्ष भगवती कुमारी चौधरीके अध्यक्षतामे हुइल कार्यक्रममे उहाँ यूवाहुकनहे आपन भविष्य बनाइक लाग सबसे पहिले अपनही जागरुक हुईपर्ना बटैली ।
उहाँ कहली, गाउँपालिकासे बालबालिकाहुकनके टमान क्षेत्रमे काम करटी बा । गुणस्तरीय शिक्षा, लागु औषध दुव्र्यशनी न्यूनिकरण, बालविवाह न्यूनिकरण ओ पोषणके क्षेत्रमे कार्यक्रम बनाके आघे बह्रल बा ।

गाउँपालिका केल्ह लागके नैहुइना बल्की सक्कु जाने जागरुक हुई पर्ना उहाँ बटैली । आपन भविष्य बनैना यूवाहुकनके हातमे रना कहटी यूवाहुक्रे आब कुछ करम कहिके आघे बह्रना जरुरी रहल बटैली । हातमे १० अंगरी रहल कहटी यूवाहुकनहे ओस्टे कुछ मजा काम करके १० मे एक आके डेखैना आग्रह करली ।
कैलारी गाउँपालिका शिक्षा शाखा प्रमुख गणेश प्रसाद मिश्र आघे बह्रक लाग यूवाहुकनहे शिक्षामे ध्यान डेना आग्रह करलै । उहाँ कहलै, विद्यालयमे पह्रटी पह्रटी बाल विवाह करलेसे भविष्यमे पस्टैना ओरसे छोट उमेरमे भोज नैकर्ना आग्रह करलै ।

सामाजिक विकास शाखा प्रमुख यगम कलेल अब्बेक अवस्थामे सक्कु डाईबाबा कैडिही कना भावना हटाके यूवा अपनही लागे पर्ना बटैलै । यूवाहुकनहे आघे बह्रे नैडेना लागुऔषध, बालविवाह रहल बटैलै । बालबालिका छोटेम मन्से मोवाइल चलैना ओ ओकर दुरुपयोग करलपाछे पह्राईमे उ फे बाधक बनल उहाँ बटैलै ।
मोवाइल कना मजा चिज हो यकर सदुपयोग करे सेक्लेसे विद्यालयमे पह्रैना कितावसे ढेर ज्ञान लेहे सेक्ना मने आजकाल्ह बालबालिका टिकटक बनैना, रिल्स बनैना ओ ओम्ने रमैना करल बटैलै ।

स्वास्थ्य शाखा प्रमुख नरेश कुमार चौधरी खुला सिमा नाकाके कारण लागु औषध दुव्र्यशन बह्रल बटैलै । पह्रना विद्यार्थी ढेर लागु औषधमे फस्टी गैल कहटी यूवा क्लव यिहीहे रोकेक लाग लागे पर्ना बटैलै । कैलारी गाउँमे बालविवाह कहटी गैल बरस ३८ जाने २० बरससे तरेक महिला बच्चा जन्माइल मने यी बरस आके २० बरस तरेक बच्चुा जन्मुइया संख्या ८८ पुगल बटैलै । बालविवाह रोकेक लाग पैरवी कार्यक्रम आवश्यक रहल बटैलै ।

ओस्टेक करके कैलारी गाउँपालिकामे सक्कु चिज रहल मने ८८ पालिका मन्से पोषणके अवस्था हेरेबेर पाँचौ स्थानमे रहल बटैलै ।

कैलारी गाँउपालिका हसुलियामे २०८१ जेठ ०९ ओ १० गते गाउँपालिका स्तरिय वाल भेला कार्यक्रमसे १० बुदे ध्यानाकर्षण पत्र हुइल रहे । ध्यानाकर्षण पत्रमे पढाईसे वञ्चित हुइल वालवालिका विपन्न ओ अपाङ्गता हुइल वालवालिका शैक्षिक समाग्री, देश ओ छात्रावृतिके व्यवस्था करेपर्ना कहल बा ।

ओस्टेक करके अति जोखिममे रहल वालवालिकाके तथ्याडकके अनुगमन करके बालबालिकाके अवस्था बुझके कैलारी गाउँपालिकासे सहयोग करेपर्ना, समाजमे रहल कुप्रथा लागु पदार्थ ओ बालविवाह सम्वन्धी जनचेतनामुलक सरोकारवालासंग अन्तरक्रिया कार्यक्रम ओ सडक नाटक करेपर्ना कहल बा ।

वालवालिकाहुकनके लाग जीवन उपयोगी सीप कक्षा सञ्चालन करेपर्ना, योजना छनौट प्रक्रियामे बालबालिकाहुकनहे अर्थपूर्ण सहभागिता करेपर्ना कहल बा ।
बाल श्रममे रहल वालवालिकाहुकनहे विद्यालयमे भर्ना करके अवस्यक शैक्षिक समाग्री ड्रेस सहयोग करेपर्ना, बाल संरक्षण कोष स्थापना करके गाउँपालिकाके कुल बजेट मध्य ५ प्रतिशत बजेट बाल संरक्षण कोष धारेपर्ना कहल रहे ।

गाउंपालिका स्तरिय वाल संजालमे रहल बाल क्लवहे वाल संरक्षण आ नीति सम्बन्धी तालिम सञ्चालन करेपर्ना, लागु पदार्थ दुव्र्यसन सम्बन्धी हरेक सामुदायिक स्कूलमे कार्यक्रम सञ्चालन करेपर्ना, हरेक वडामे टोल बडा स्तरीय बाल सञ्जाल गठन करके कार्यक्रम अर्थपूर्ण सहभागीता करेपर्ना कहल रहे । कार्यक्रमके सञ्चालन तथा सहजीकरण बाल कल्याण संघके सहजकर्ता प्रेम चौधरी करल रहिट । कार्यक्रममे बाल संजालके संयोजक सुमतबहादुर चौधरीलगायत वाल संजालके सदस्य तथा यूवाहुकनके सहभागिता रहे ।