दृष्टि फाउन्डेसनमे खाद्यान्न तथा शैक्षिक सामग्री सहयोग   

धनगढी, १५ भदौ । धनगढीस्थित माया मेट्रो अस्पताल प्रा.लि.से स्वास्थ्य सेवाके क्षेत्रमे अपन ८ वर्षे यात्रा पूरा करल अवसरमे सामाजिक सेवामार्फत वार्षिकोत्सव मनैले बा ।

अस्पतालसे धनगढी उपमहानगरपालिका–१३ स्थित दृष्टि फाउन्डेसनमे खाद्यान्न सामग्री सहयोग कैनाके साथे उहाँ अध्ययनरत विद्यार्थीहुकनहे शैक्षिक सामग्री वितरण करले बा । साथे, फाउन्डेसनमे आश्रित सक्कु असहाय, अशक्त तथा बालिकाहुकनहे भोजन कराके अस्पतालसे अपन वार्षिकोत्सव मनाइल हो ।

अस्पतालसे ८ वर्षके अवधिमे हजारौँ बिरामी तथा ओइनके परिवारहे स्वास्थ्य सेवा प्रदान करटी आइल जनैले बा । अस्पतालके अनुसार यी यात्रामे चिकित्सक, स्वास्थ्यकर्मी तथा कर्मचारीके समर्पणसंगे बिरामी तथा सेवाग्राहीके निरन्तर विश्वास ओ साथ महत्वपूर्ण रहटी आइल बा ।

माया मेट्रो अस्पतालसे २४ सै घण्टा आकस्मिक तथा ट्रमा सेवा ओ फार्मेसी सञ्चालन करटी आइल बा । अस्पतालमे  आईसीयू, एनआईसीयू तथा पीआईसीयूलगायतके अत्यावश्यक सेवाफे उपलब्ध बटै ।

ओस्टे अस्पतालसे एमआरआई, ६४–स्लाइस सीटी स्क्यान, बायोप्सी तथा क्यान्सर स्क्रिनिङ, विशेषज्ञ चिकित्सकसे उपचार तथा परामर्श, आधुनिक डायग्नोस्टिक तथा प्रयोगशाला सेवासमेत प्रदान करटी आइल जनैले बा ।

अस्पतालमे इन्डोस्कोपी, टीएमटी, एबीपीएम, होल्टर, इको तथा ईसीजीलगायतके परीक्षण सुविधा उपलब्ध बटै । एसी डिलक्स क्याबिनसहितके ओपीडी सेवा, अनलाइन अपोइन्टमेन्ट तथा भुक्तानीके सुविधासमेत सञ्चालनमे रहल अस्पताल जनैले बा । ८औँ वार्षिकोत्सवके अवसरमे अस्पतालसे आगामी दिनमे आधुनिक प्रविधिके प्रयोग, विशेषज्ञ स्वास्थ्य सेवाके विस्तार तथा उपचारके थप सुविधा सञ्चालन करटी सुदूरपश्चिममे भरपर्दो ओ गुणस्तरीय स्वास्थ्य सेवाके केन्द्रके रूपमे अपनहे थप सशक्त बनैना प्रतिबद्धता जनैले बा ।

अस्पतालसे अपन ८ वर्षे यात्रामे साथ, विश्वास ओ माया प्रदान कैना सक्कु बिरामी, सेवाग्राही, आफन्तजन, शुभेच्छुक, चिकित्सक, स्वास्थ्यकर्मी तथा कर्मचारीप्रति आभार व्यक्त करले बा ।

अस्पतालसे वार्षिकोत्सवहे केवल उत्सवके रूपमे केल्ह नैहुके सामाजिक उत्तरदायित्वसँग जोरटी असहाय तथा आवश्यकतामे रहल समुदायसँग खुसी सट्न प्रयास करल जनैले बा ।