हावाहुरीसहितके पठ्रापानीसे धानबाली ओ विद्युत् संरचनामे क्षति
पहुरा समाचारदाता
धनगढी, २१ कुँवार । कैलालीमे बुधबार बिहान आइल आँधीसहितके पठ्रापानीसे धानबालीमे क्षति पुगल बा । हावाहुरीके कारण टमान स्थानमे रुख ढलके विद्युतके पोल तथा तारमा समेत क्षति पुगल बा ।
विशेषकैके जिल्लाके घोडाघोडी नगरपालिका क्षेत्रमे हावाहुरीके प्रभाव ढेर परल बा ।
नेपाल विद्युत् प्राधिकरण पहलमानपुर वितरण केन्द्रके प्रमुख लोकविक्रम मल्लके अनुसार हावाहुरीके कारण घोडाघोडी क्षेत्रके टमान स्थानमे ५० से ढेर विद्युतके पोल ढलल बा । पहलमानपुर, आमखैया, जवलपुर, सिम्थरीलगायतके स्थानमे रुख ढलके विद्युतके पोल तथा तारमे क्षति पुगल उहाँ जानकारी डेलैं ।
हावाहुरीके कारण विद्युत् संरचनामे क्षति पुगलपाछे घोडाघोडी क्षेत्रके टमान स्थानमे बुधके बिहानसे विद्युत् आपूर्ति अवरुद्ध हुइल बा । विद्युत् सेवा सञ्चालनके लाग प्राधिकरणके कर्मचारी तथा प्राविधिक क्षतिग्रस्त क्षेत्रमे पुगके मर्मत कार्यमे खटल बटैं ।
पठ्रापानीसँगे आइल हावाहुरीसे किसानसे कट्ना तयारी अवस्थामे रहल पाकल धानमेसमेत क्षति पुगल बा । कुछ किसानसे काटल खेत तथा घरलग्गे रहल धान वर्षाके कारण भिजल बा । लगातार पानी परलेसे कट्ना तयारी अवस्थामे रहल धानमे थप क्षति पुग्न कटि किसान चिन्तित हुइल बटैं ।
अस्टेक, हावाहुरीके कारण जिल्लाके टमान स्थानमे रुख ढरनाके साथे कुछ घरके छाना उराइल प्रहरी जनैले बा । इलाका प्रहरी कार्यालय सुखडके अनुसार हावाहुरीसहितके वर्षासे हालसम मानवीय क्षति हुइल जानकारी प्राप्त हुइल नैहो । मने, टमान स्थानमे रुख ढरल ओ घरके छाना उराइल विवरण प्राप्त हुइल प्रहरी जनैले बा ।
हावाहुरीके कारण हुइल क्षतिके पूर्ण विवरण संकलन हुइटिरहल सम्बन्धित निकाय जनैले बा । विद्युत् संरचनामे हुइल क्षतिके मर्मत तथा अवरुद्ध विद्युत् सेवा नियमित करैना प्राधिकरणके प्राविधिक फिल्डमे खटल बटैं ।
