एभरेष्ट एकेडेमीसे गेटमे सेनिटाइजिङ टनेल स्थापना

सिकाई रोक्लेसे जीवन रुकी प्रअ, लौवा प्रविधिसे सुरक्षित महशुस हुइल विद्यार्थी

पहुरा समाचारदाता
धनगढी, ५ पुस । कैलालीके गोदावरी नगरपालिका अत्तरियास्थित एभरेष्ट एकेडेमी विद्यालयमे कोरोना संक्रमणसे बाँचेक सुदूरपश्चिम प्रदेशमे सबसे पहिल चो सेनेटाइजिङ टनेल स्थापना करले बा ।

विश्व स्वास्थ्य संगठनके मापदण्ड अन्सार विद्यालयसे स्थापना करल मेसिन सेनेटाइजिङ टनेलके उद्घाटन गोदावरी नगरपालिकाके उपप्रमुख रत्न खडायत करल रही । विद्यालयके अपने लगानीमे गेटमे स्थापना करल सेनेटाइजिङ टनेलमे विद्यार्थीनहे थर्मल गनसे चेकजाँच करके मेसिनमार्फत पुरा शरीर सेनिटाइजिङ हुइना व्यवस्था मिलाइल प्रधानाध्यापक स्माइल चौधरी बटैलै ।

‘शिक्षाके सिकाईहे रोके नइपरल कना हमार मान्यता हो,’ उहाँ कहलै–‘कोरोना २०२५ से ३० सम जाई सेकठ, उ बेलासम हम्रे सिकाईहे रोक्बी कलेसे जीवन रुके सेकी ।’ अब्बेक अवस्था हेरेबेर कोरोनामय जीवन हुसेकल बा, उहीसे बच्टी पूर्व सावधानी अपनके विद्यालय संचालन करल उहाँक कहाई बा ।

सुरुसुरुमे डब्लुएचओ के करल प्रचारप्रसार अन्सार हात धुइना, सेनिटाजर लगैना बाट अइलेसेफे आकुर प्रभावकारी प्रविधिके प्रयोगसे विद्यार्थी अभिभावक सुरक्षित महशुस करटी आत्मविश्वासफे बह्रल प्रअ स्माइल कहलै ।

गोदावरी नगरपालिकाके उपप्रमुख रत्न खडायत एभरेष्ट एकेडेमीसे स्थापना करल सेनिटाइजिङ टनेल नौलो ओ यूनिक रहल बटैली । ‘विद्यार्थीनके भविष्य मजा बनाइक लाग पह्राई ना रुके कहिके विद्यालयसे लौवा प्रविधि अपनाइल यी सह्रानिय कार्य हो,’ उहाँ कहली–‘सबजाने अस्टे प्रविधि अपनैलेसे कोरोना संक्रमण रोके सेक्जाई ।’ गोदावरी नगरपालिका सुदूरपश्चिम प्रदेशके कोरोना ट्रान्जिप्ट पोइन्ट रहल ओरसे यहाँ आठसय ढेर संक्रमित रहल ओ १० जानेक ज्यान गैल उहाँ कहली ।

नगरपालिकाके नगर शिक्षा शाखा यहाँके सार्वजनिक ओ नीजि विद्यालयके प्रअ हुकनसे छलफल करके सात ठो मापदण्ड अनुरुप विद्यालय संचालन करल नगर उप प्रमुख बटैली । एभेरेष्ट एकेडेमी नौलो प्रविधि अपनाइल ओरसे लौवा सन्देशफे गैल उहाँ कहली । उ विद्यालयसे पहिलेसे लौवा लौवा कार्य करटी आइलफे बटैली ।

उ विद्यालयके कक्षा ८ मे पह्रना छात्रा प्रिन्सि भट्ट कोरोना संक्रमणके बेला विद्यालयसे लौवा प्रविधिसे सेनिटाइजिङके व्यवस्था मिलाइलपाछे ढुक्कहुके पह्रे पाइल बटैली । ओस्टेक कक्षा ९ मे पह्रना छात्र हेमन्त भट्ट विद्यालयसे मेसिनमार्फत होलवडीमे सेनिटाइजिङके व्यवस्था मिलाइलपाछे सुरक्षित महशुस हुइल बटैलै ।

अत्तरिया क्षेत्रके स्थानीयबासी तथा अभिभावक निर्मल कार्की विद्यालय प्रवेश हुईबेर ओ घर लौटेबेर मेशिनसे पुरा शरिर सेनिटाइजिङके व्यवस्था करलपाछे विद्यार्थी ओ अभिभावकके खुशी हुइल बटैलै । उहाँ कहलै, ‘घरसे बच्चा पठाइबेर बोटलमे सेनिटाइजर मास्का डेके पठाई, आबसे विद्यालय मेशिनसे सेनिटाइजिङके व्यवस्था करलपाछे उहीसे मनोवलफे बह्रल बा ।