दिगो विकास लक्ष्य ४.७ बारे छलफल
पहुरा समचाारदाता
धनगढी, ८ पुस । ‘गुणस्तरीय सार्वजनिक शिक्षा सम्भव बा’ कना नाराके साथे दिगो विकास लक्ष्य ४.७ बारेमे धनगढीमे सरोकारवालाहुकन विच छलफल हुइल बा ।
पिसविन, फाया नेपाल ओ एनसिइ नेपालके संयुक्त आयोजनामे मंगरके रोज धनगढीमे दिगो विकास लक्ष्यबारेमे छलफल हुइल रहे ।
कार्यक्रममे पिसविनके अध्यक्ष लालबहादुर ओली दिगो विकास लक्ष्यमे शिक्षाके बारेमे चर्चा करल रहिट । समावेशी ओ गुणस्तरीय शिक्षाके सुनिश्चिता करे परठ कना १७ ठो लक्ष्य मध्यके दिगो विकास लक्ष्य ४.७ रहल उहाँ बटैलै ।
दिगो वातावरण व्यवस्थापन, लैगिक समानता, स्वास्थ्य ओ युवा रोजगारसंग सम्बन्धित हुइल ओरसे यकर कार्यान्वयन ओ बजेट व्यवस्थापनके लाग स्थानीय तहहे सुझाव डेहल उहाँ जानकारी डेलै ।
गुणस्तरीय सार्वजनिक शिक्षा समावेशी प्रक्रियाके माध्यमसे सम्भव रहल ओरसे स्थानीय तहसे लगानी कैना आवश्यक रहल उहाँ बटैलै ।
कार्यक्रममे शिक्षा सरोकार समूहके संयोजक शेर बहादुर बस्नेत, धनगढी उपमहानगरपालिका वडा नम्बर ८ के अध्यक्ष नारायण बराल, फाया नेपालके नीति तथा साझेदार संयोजक धनपति ढुङेल, सुरक्षित मातृत्व संजाल महासंघ नेपालके प्रदेश संयोजक राजेन्द्र रैका, भूमिअधिकारकर्मी जमुना विका लगायत अपन बाट धारल रहिट ।
कार्यक्रम धनगढी उपमहानगरपालिका वडा नम्बर १५ के अध्यक्ष फुलराम चौधरीके अध्यक्षतामे समापन हुइल रहे ।
कार्यक्रममे स्थानीय तहके जनप्रतिनिधि, संघ÷संस्थाके पदाधिकारी, विद्यालयके शिक्षक ओ सञ्चारकर्मीनके सहभागिता रहे ।
