कृषि विकास बैंकके भवन ओ लकर उद्घाटन
पहुरा समाचारदाता
धनगढी, १२ पुस । कृषि बिकास बैंक धनगढी शाखा कार्यालयके अपने नवनिर्मित बैंकिङ कार्यालय तथा सुविधा सम्पन्न लकर सेवा उद्घाटन करगिल बा ।
बैंकके प्रमुख कार्यकारी अधिकृत अनिलकुमार उपाध्याय भवन उद्घाटन करल हुइट । ग्राहकके सेवाहे मध्यनजर करटी प्रदेश कार्यालयमे रहल जग्गा सदुपयोग करके अपने शाखासे सेवा सुरु करल प्रमुख कार्यकारी अधिकृत उपाध्याय बटैलै ।
अपने कार्यकारी अधिकृत हुइल पाछे देशके भाडामे रहल बैं
किङ काउण्टर विस्थापित करटी अपने कार्यालयमे ढरना काम सुरु करल उहाँ बटैलै । ‘जनताके विश्वास जिटल कृषि विकास बैंकहे थप व्यवस्थित बनाइक लाग हम्रे अपने कार्यालय स्थापना करके सेवा प्रदान कैना योजना बनैले बटी,’ उहाँ कहलै– ‘जौन अनुसार अब्बा देशके टमान स्थानमे अपने कार्यालय निर्माण हुइटी रहल बटै ।’
कृषि क्षेत्र ओ छोट ऋण लेना व्यवसायीहे प्राथमिकतामे ढरटी कम नाफामे ढेर सेवा डेना उद्देश्यके साथ कृषि विकास बैंक काम करटी रहल उहाँ बटैलै ।
कृषि बिकास बैंकके उपमहाप्रबन्धक धुब्रचन्द्र गौतम ग्राहकहे विश्वव्यापी रुपमे बैंकसे डेना सेवा उपलब्ध करैना कृषि बिकास बैंक सक्षम रहल बटैलै । उहाँ हलहल देशभरके बाणिज्य बैंङ्कमे कृषि बिकास बैंक १ नम्बर बन्न बटैलै ।
कृषि बिकास बैंक सुदूरपश्चिम प्रदेशके निर्देशक गोकुल पनेरु अपने भवनसे ग्राहकहे सेवा डेहे पाइलमे खुशी लागल बटैलै ।
व्यवसयी तथा कृषि बिकास बैंकके ग्राहक केएस कन्ट्रक्सनके सञ्चालक खडकसिंह पाल कृषि विकास बैंङ्क सक्कुहुनके भरोसा ओ विश्वासके बैंङ्क रहल बटैटी ग्राहकहे ढेरसे ढेर सेवा डेना आग्रह करलै । ओस्टके ध्रुवतारा कन्ट्रक्सनके सञ्चालक ध्रुव कुवँर फेन छोटसे बरवार उद्योगी, कृषक सक्कुहुनके पहिल रोजाईमे कृषि बिकास बैंङ्क परना करल बटैलै ।
कृषि बिकास बैंक बैंकिङ कार्यालय धनगढीके प्रबन्धक राजेन्द्र जोशीके अध्यक्षतामे सम्पन्न भवन उद्घाटन कार्यक्रम सञ्चालन बैंकके कर्मचारी चक्रबहादुर कुञ्जेडा करले रहिट ।
