विद्यार्थीनहे बाहिरी ज्ञान बुझाइक लाग समुदायके अध्ययन

पहुरा समाचारदाता
धनगढी, १६ पुस । कैलालीके गोदावरी नगरपालिकामे रहल एभरेष्ट एकेडेमी विद्यार्थीहुक्रनहे समुदायस्तरके टमान विषय बस्तुके अध्ययन अनुसन्धानके अभ्यास करैटी रहल बा ।

विद्यार्थीहुक्रनहे किताबी ज्ञानमे किल सीमित नाइ राखके उहाँहुक्रनहे बाहिरी ज्ञानमे पोख्त बनैना उद्देश्ये समुदायमे पुगके अध्ययन अनुसन्धानके करैटी रहल विद्यालयके प्राध्यापक बंशीराम चौधरी बटैलै । उहाँ समुदायके वास्तविकतासंग विद्यार्थीहे परिचित करैना उद्देश्यसे फेन समुदायके अध्ययन, अनुसन्धान अभ्यास कराइ लागल जानकारी डेलै ।

विद्यालयसे पहिलेसे नै विद्यार्थीहे बाहिरी ज्ञानमे सक्षम बनाइक लाग टमान मेरिक प्रयोगात्क सिकाई कार्यक्रम सञ्चालन करटी आइल प्राध्यापक चौधरी बटैलै । उहाँ यी बरस कोरोना कहरसे व्यवस्थित ओ सरकारके मापदण्ड अपनाके विद्यार्थीहुक्रनहे समुदायमे लैजाके अनुसन्धान करे सिकाइल बटैलै ।

‘विद्यार्थी अपनहे ज्ञानके निर्माण करे सेकिट कहिके उहाँहुक्रनहे समुदायके अध्ययन कराइ लागल हुइ ।’ ‘किताब टे एकठो माध्यम किल हो । मने, विद्यार्थी अपनहे ज्ञान निर्माण करे सेकिट ओ उहीहे बाँटे सेकिन कहिके हम्रे उहाँहुक्रनहे समुदाय स्तरमे लैजैटी रहल बा’, प्राध्यापक चौधरी कहलै ।
विद्यालयके कक्षा ९ ओ १० के विद्यार्थी कञ्चनपुरके कृष्णपुर नगरपालिकास्थित बाणी मुक्त कमैया शिविर ओ विजयसाल होमस्टे पुगके टमान सामाजिक मुद्दामे अध्ययन अनुसन्धान करल जनाइल बा ।

कोरोनासे जीवनयापनमे पारल प्रभाव, विजय साल होमस्टेके आन्तरिक पर्यटन, महिला सशक्तिकरण, मुक्त कमैयाहुक्रनके शिक्षा ओ चेतनाकेस्तर जैसिन विषयमे विद्यार्थी अध्ययन अनुसन्धान करल हुइट । ओस्टके, थारु टरटिहार, मुक्त कमैयाके लावा पेशा, मुक्त कमैयाके पहिले ओ अब्बेक अवस्थाके तुलनात्मक अध्ययन, भलमन्सा प्रथा एक सूक्ष्म प्रजातान्त्रिक अभ्यास लगायतके विषयमे अध्ययन करल जनाइल बा ।

विद्यार्थीहुक्रे टममान विषयमे करल अध्ययनके निष्कर्षसहित प्रतिवेदन तयार पारके कृष्णपुर नगरपालिकाहे बुझैना जनाइल बा ।‘यिहीसे स्थानीय सरकारहे नीति तथा कार्यक्रम निर्माणमे फेन सहयोग पुग्ना बा’, ेप्राध्यापक चौधरी कहलै ।

उ विद्यालयके विद्यार्थी गोदावरी नगरपालिका ओ कृष्णपुर नगरपालिकामे सरकारी कामकाजके लाग तयार पारजैना चिठीपत्रमे हुइना शब्द शुद्धाशुद्धीबारे समेत अध्ययन कैना जनाइल बा । डुनु नगरपालिकाके अध्ययन प्रतिवेदन सार्वजनिक कैना प्रिन्सिपल चौधरी बटैलै । उहाँ आपन विद्यालयसे ‘मल्टिपल इन्टेलेक्चुअल’ ओ स्टीम (साइन्स, टेक्नोलोजी, इन्जिनीयरिङ ओ म्यानेजमेन्ट) सिद्धान्तके आधारमे विद्यालय पठनपाठन करैटी आइल बटैलै ।