विदेशसे लौटल तेजप्रसाद छेगरीपालनमे
पहुरा समाचारदाता
धनगढी, १९ पुस । कैलालीके धनगढी उपमहानगरपालिका वडा नम्बर १४ डी गाउँके तेजप्रसाद तिवारी व्यवसायिक रूपमे छेगरीपालन सुरु करले बटै ।
चार वर्ष मलेसियामे काम करके उहाँ कोरोना महामारीके बीचमे स्वदेश लौटके छेगरीपालन सुरु करल हुइट । विदेशमे नम्मा समय दुःख करल तिवारी अब स्वदेशमे व्यवसाय कबैना ओ घर परिवार संगे बैठना सोच बनैले बटै ।
झण्डे सात लाख ढेर लागतमे छेगरीपालन सुरु करल उहाँ यिहीहे भविष्य मन्टी व्यावसायिक रूप डेना विस्तारफे करटी बटै । शिकारके माग बढटी गैल ओरसे बजारके मागहे दृष्टिगत करके खोर निर्माण करके व्यवसाय सुरु करल उहाँक कहाई बा ।
‘मजा हुइटी बा, यी व्यवसायहे विस्तार करेक लाग ऋण लेना प्रक्रियामेफे आघे बह्रल बटु’, तिवारी कहलै– ‘ठप छेगरी ढरनाके साथे बोयर छेगराफे नन्ना योजना बा, बजारके कौनो समस्याफे नइहो, आब विदेश यिहे बनैम ।’ लकडाउनके समयमे स्वदेश लौटल तिवारीहे छेगरीपालन कैना डिमेघा कैलालीसे सञ्चालन करल ‘कोभिड–१९ प्रभावितके लाग सामाजिक आर्थिक रिकभरी परियोजनासे सहयोग करल हो ।
युएनडिपीके आर्थिक सहयोग तथा धनगढी उपनगरपालिकाके समन्वयमे डिमेघा कैलालीसे सञ्चालन हुइल परियोजनामे ५ दिने उद्यमशीलता तालिम लेहलपाछे उहाँ छेगरीपालनओर लागल हुइट । ‘तालिम पश्चात छेगरीपालन कैना ठप ५ दिने सीप विकास तालिम पागिल ।
दुनु तालिम लेहलपाछे मै यी व्यवसायओर लागल हुँ । मै भिटरके काम कैना क्षमताहे तालिमसे उजागर कैना मदत्त मिललपाछे महीहे व्यवसायिक डगरमे आघे बह्रना सहयोग करले बा । ‘आब पुरे जीन्दगी छेगरीपालनमे बिटठ की जस्टे लागल बा’–तिवारी कहलै ।
यी व्यवसायसे मजा आम्दानी हुइनाके साथे समयके फे सदुपयोग हुइना ओरसे यिहीहे व्यवसायिक रूप डेहे लागल तेज बटैठै । और व्यवसायसे सहजुल, ठोर मिहिनेतमे ढेर आम्दानी लेहे सेक्ना
हुइल कारण छेगरीपालनमे लागल बटैना उहाँ कुछ छेगरी बेचके आम्दानी समेत करटी रहल बटै । उहाँ विदेशसे कमाइल कुछ ओ बाँकी ऋण लेके छेगरीपालन करले बटै ।
खोरफे नमुनामे रुपमे बनाइल बा । खोर वरपर टे जालीसे घेरके छेगरी ओकरे भिटर धारल बा । उहाँहुकनहे आवश्यक दानापानीफे उहे भिटर जाके डारे सेक्जाइठ । छेगरा बह्रटी रहल ओ बह्रैना बाँकी बा । मने किन्न मनै अइटी रहल तिवारीके कहाई बा ।
