‘विद्युत सहकारी समस्यामे रहल बा’
पहुरा समाचारदाता
धनगढी, २० पुस । धनगढी उपमहानगरपालिकाके प्रमुख नृपबहादुर वड समुदायमे विद्युतसेवा बिस्तारके लाग गठन हुइल विद्युत सहकारी संस्था समस्यामे रहल बटैले बाटै ।
सोम्मारके श्री शिवभोले ग्रामिण विद्युत सहकारी संस्थाके ११ औं बार्षिक साधारणसभाके उद्घाटन करटी नगरप्रमुख वड उ धारणा राखल हुइट । नेपाल विद्युत प्राविधकरण ओ सहकारी बिच समन्वय हुइ नाइ सेकके समस्या रहल बा नगरप्रमुख वड कहलै, ‘सहकारीके अन्यत्रसे खासे सहयोग नाइहो ।’
एक औरे प्रसंगमा दर्ता होके संचालनमे नाइ रहल सहकारी संस्थासे खारेज कैना बटैले बाटै । उहाँ दर्ता कैके सहकारी संस्था झोलामे ढर्नाके अर्थ नाइ रहठ् नगरप्रमुख वड कहलै, संचालनमे नाइ रहल सहकारी खारेजी वा मर्ज कैना तयारीमे जुटल बाटी ।
नगरप्रमुख वडसे सहकारीमे सक्कु जनहनके पहुँच बृद्धि कैना आवश्यक रहल बटैलै । उहाँ कहलै– ‘बरवार बैंकमे सक्कु नागरिकके पहुँच नाइ रहठ् ओहेमारे ओकर बिकल्पके रुपमे फेन सहकारी संस्था रहल बावै ।
सहकारीसे व्यावसायीक कृषी क्षेत्रमे लगानी लगाइ पर्नामे नगरप्रमुख वड बटैलै ।’ उहाँ कहलै– ‘ज्या कैलेसे जनताके जिवनस्तर उपर उठे सेकी ओम्हे लगानी केन्द्रित हुइना आवश्यक बा । नगरप्रमुख वड शेयर सदस्यहुक्रनहे बचत कैना बानीके विकास करक लाग सहकारी शिक्षा आवश्यक रहल बटैलै ।’
धनगढी उपमहानगरपालिका वडा नम्बर १५ के अध्यक्ष फुलराम चौधरी सहकारी संस्था प्रजातन्त्र पाछेक उपज रहल बटैलै । उहाँ कहलै, लोकतन्त्रके अभ्यास सिकक लाग सहकारी संस्थाके बारेम बुझ्ना जरुरी रहठ् । सहकारी कहलक सहकार्यसे चल्ना रहल ओरसे सक्कु सदस्यके ओत्रे भूमिका रहठ् । कार्यक्रम श्री शिवभोले सहकारी संस्थाके अध्यक्ष सुकदेव रानाके अध्यक्षतामे हुइल रहे ।
ओहे बिच श्री शिवभोले सहकारी संस्थाके भवन सिलान्याश करल बा । नगरप्रमुख वड भवनके सिलान्याश करल रहिट । धनगढी उपमहानगरपालिकाके ११ लाख ५० हजार सहयोगमे भवन निर्माण हुइ लागल हो ।
