पूर्वकमलरी रजनीके सिपसे लेहे पर्ना सिख्खा
एकठो कहकुट बा, खैना मुँहहे मोंछ नै सेकठ । इ बाट बर्दगोरिया गाउँपालिका–२ झगरपुर, कैलालीके रजनी चौधरीके जिन्गिसे मेल खाइठ । कौनो समय आनक घर कमलरी लागल उ अब्बे अपन सिपमुलक काम टेलरिङसे मैन्हक ७५ हजार कमाहि किल नै कर्ले हुइ,
संगसंगे ६ जनहनहे रोजगारी फेन डेले बटि ।
आज टमान युवा एमए पासके सर्टिफिकेट लेके वेरोजगार जिन्गि जिटि तनावके अवस्थामे बटाँ । तनाव हटाइक लग डिने डुपहरे बोटलके सहारा लेटि बटाँ । मने २०७३ सालसे टेलरिङके व्यावसाय सुरुवाट करल उहाँ छोटे उमेरमे उद्यमी बनके बहुट युवनके प्रेरणाके स्रोत बनल बटि ।
रजनी चौधरीके डाई बाबा मुक्त कमैया हुइन । ओहेसे हुँखिन फेन कमलरी लग्ना बाध्यता आइ पर्लिन । हुँखिन औरेक घर काम करके पह्रना बहुट साँसट हुइलिन । बरबट्टि सरबट्टि एसएलसी सम डेलि, मने परिक्षा बिगर गैलिन । मने उ जिन्गिसे हरेस नै खैलि । २ बरस खाली बैठके टेलरिङके काम सिख्ली । मन लगाके सिखल सिप आज हुँकार जिन्गि जिना सहारा किल नाहि औरे जहनके फेन सहारा बनल बटि ।
हमार पुर्खा रिनसे डराइट । रिन महा घिनाहुन चिज हो कहिट । ओहे डरके मारे ओइने खेटि बाहेक आउर लावा पेसा सोंचे नै सेक्लाँ । मने रजनी अपन टेलरिङ व्यवसायहे आगे बह्राइक लग रिन लेलि । मजा व्यवस्थापनके कारन रिन टिर्टि गैल बटि । हिम्मत, आँट बरा चिज हो । छाइ होके छावनके कान कट्ना मेरिक उडाहरिनय कामेम बटि रजनी ।
थारु समाजमे एकठो कहकुट बा, ‘पाह्रा पन्डिट कौने काम, कोडरा मारो धाने धान ।’ इहे कहकुटके कारन फेन बहुट जे पह्रटि पह्रटि ढिला डेठाँ । मने रजनी व्यावसायसंगे अब्बे फेरसे पह्राईहे निरन्तरता डेटि बटि । इ हुँकार डोसर हिम्मट हो । इ बरससे बौनियाँमे रहल बसन्त मुरारी माविमे फेरसे कक्षा नौ भर्ना हुइल बटि । बुह्राइल सुग्गा का पह्रे कहिके पह्राइ छोरके बैठल मनैनके लग फेन उ प्रेरणाके स्रोत हुइटि । क्याबाट रजनी, टोहार भावि जिन्गिके लग टुहिन सलाम बा ।
सम्बन्धित समाचार
