मेलमिलाप सम्बन्धी पुनर्ताजकी कार्यक्रम
पहुरा समाचारदाता
धनगढी, २१ पुस । धनगढी उपमहानगरपालीकाके न्यायिक समितिसे आयोजना करल मेलमिलापकर्ताहुकनके लाग एक दिने पुनर्ताजकी कार्यक्रम मंगरके रोज निम्जल बा ।
मेलमिलापकर्ताहुकनहे मेलमिलाप सम्बन्धी सीप ओ ज्ञानके बारेमे पुनर्ताजकी करैना उद्देश्यसे कार्यक्रमके आयोजना करल धनगढी उपमहानगरपालिकाके उपप्रमुख तथा न्यायिक समितिके संयोजक सुशीला मिश्र भट्ट बटैली ।
मेलमिलापकर्ताहुक्रे विवादमे मेलमिलापके लाग सहजीकरण करेबेर भोगे परल समस्या ओ अनुभव उहाँहुकनसे सुन्न काम हुइल समितिके संयोजक मिश्र कहली, ‘अइना दिनमे मेलमिलापकर्ता कैसिक प्रभावकारी रुपमे काम करे सेक्ही कना मजा छलफल हुइल ।’ मेलमिलापकर्तासे ढेर मजा सुझाव आइल न्यायिक समिति संयोजक मिश्र बटैली ।
न्यायिक समितिके संयोजक मिश्र सक्कु वडामे मेलमिलापकर्ताहुकन काम करक लाग मेलमिलाप केन्द्रके व्यवस्थापन कैना काम हुइटी रहल बटैलै । कुछ समय पाछे पुनर्ताजकी तालिमके आयोजना कैना जानकारी न्यायिक समितिके संयोजक मिश्र डेली ।
धनगढी उपमहानगरपालिकाके प्रमुख प्रशासकीय अधिकृत जगन्नाथ पन्त न्याय सम्पादनके काम अपनहीमे जटिल हुइना बटैलै । मेलमिलापकर्ताहुक्रे फैसला नै करना कि विवाद मिलैना हो प्रमुख प्रशासकीय अधिकृत पन्त कहलै, ‘टबमारे मुद्दा होके मेलमिलापकर्ता उहाँ अइना विवाद हो ।’
विवादकर्ताहुक्रे भित्रेसे मिलल पाछे किल जत्तिक विवाद मिलल मानजाइठ प्रमुख प्रशासकीय अधिकृत पन्त कहलै, ‘विवाद मिललपाछे ओकर कोइ कार्यान्वयन करैही परठ ।’
