ओझेलमे चिरैँया टल्वा

पहुरा समारचारदाता
सुखड, २२ पुस । कैलालीके घोडाघोडी नगरपालिकामे रहल चिरैँया टल्वा ओझेलमे परल बा ।

नगरपालिकाके वडा नम्बर १ ओ २ मे करिब १२७ हेक्टर क्षेत्रफलमे फैलल् उ टल्वा उचित संरक्षण सम्बद्र्धन नाइ पाके ओझेलमे परल हो । चिरैँया टल्वा जलचर, थलचर, जिबजन्तु ओ चिरैचुरुंगीनके लाग प्रमुख बासस्थानके रुपमे फेन परिचित रहल बा । रामसार सुचिमे सूचीकृत घोडाघोडी टल्वाके परिपुरक टल्वाके रुपमे रहल उ टल्वा सिमसार तथा जैविक बिबिधताके हिसावसे फेन ढिउर महत्वपूर्ण रहल बा ।

परापुर्व कालसे पौराणिक महत्व ओ प्राकृतिक सुन्दरता बोकल जलमग्न, सिमसार क्षेत्र ओ एकान्त मनोरम वातावरण रहल कारण टल्वा पर्यटन विकासके लाग योग्य ठहरल हो । सिमसार, बन्यजन्तुके बासस्थान तथा बनस्पति समेत प्रसस्त मात्रामे पाजैना उ टल्वाके विकास कैना आवश्यक रहल स्थानीय चक्र बिष्ट बटैलै । १४ ठो छोटबर टल्वाके सुन्दरता भरल उ टल्वाके पर्यटन विकासके अथाहा सम्भावना रलेसे फेन विकासमे कोइ फेन चासो नाइ डेहल स्थानी बटैठै ।

घोडाघोडी टल्वामे सबके ध्यान केन्द्रित रहल ओरसे फेन उ टल्वाउपर सरकार तथा सरकारवालाहुक्रनके नजर परे नाइ सेकल उहाँहुक्रे बटैठै । घोडाघोडीके पहिचान संगे पर्यटन ओ स्थानीयहुक्रनके आयआर्जन बृद्धिमे बरवार सम्भावना बोकल टल्वाके तीनु सरकारसे संरक्षण ओ विकासमे जोड डेहे पर्ना स्थानीयहुक्रे बटैठै । टल्वाहे व्यवस्थित कैना तिनु तहके सरकार बेवास्ता कैना करल ओ घोडाघोडी टल्वाहे किल ढिउर महत्वमे रख्ना करल ओरसे फेन चिरैँया टल्वा ओझेलमे परल औरे स्थानीय सनेश शाहीलके कहाइ बा ।

घोडाघोडी नगरपालिकासे समग्र घोडाघोडीके पर्यटन विकासके लाग पर्यटन विकास बोर्ड गठन कैके गुरुयोजना निर्माणके कामहे आघे बह्र्रैले बा । मने निर्माणाधिन गुरुयोजनामा घोडाघोडी टल्वा किल समावेश हुइना हो कि कना स्थानीयके आशंका रहल बा । यहोर नगरपालिकाके प्रमुख प्रशासकीय अधिकृत खगेन्द्रबहादुर सिंह भर घोडाघोडीमे पर्यटकीय सम्भावना बोकल सक्कु टल्वाके विकास ओ व्यवस्थापनमे लागल बटैलै ।

नगरसे नगरपालिका अन्तर्गतके कौनो फेन टल्वाहे उपेक्षा कैना मेरके काम नाइ करल ओ चिरैँया टल्वाके विकासके लाग समेत योजना निर्माण हुइटी रहल उहाँके कहाइ रहल बा ।