‘टोलमे ना खानेपानी, ना सडकमे ग्राभेल’
पहुरा समाचारदाता
धनगढी, २२ पुस । धनगढी उपमहानगरपालिका वडा नम्बर ४ तुलसी टोल बैठल दुई दशकसे ढिउर होसेकल बा । विसं २०५६/०५७ से बैठल उ टोलमे आभिनसम कौनो मेरके विकास हुइल नाइहो । धनगढीके मुटुमे रलेसे फेन उ टोलमे कौनो मेरके विकास नाइ हुइल ओरसे टोलके स्थानीय निरास हुइल बाटै ।
धनगढीके शिवपुरी धाम लग्गे रहल उ टोलमे थारु समुदायके बसोबास रहल बा । उ टोलके अधिकांश स्थानीय ऐलानी जग्गामे बसोबास करटी रहल बाटै । उहीसे फेन विकास नाइ हुइल हो कि कना स्थानीय हुक्रनके बुझाइ रहल बा ।
टोलके स्थानीय गणेश चौधरी आपन टोल दुई दशकसे ढिउर बैठल हुइलेसे फेन कौनो निकायसे टोलके विकासमे चासो नाइ डेहल बटैलै । टोलके आँजरपाँजरके टोलमे सडक ग्राभेल ओ खानेपानी लगायत पाछेक बस्तीमे पिच रोडसम बनसेक्लेसे फेन आपन टोलके विकासमे कौनो निकाय चासो नाइ डेहलमे चिन्ता व्यक्त करलै ।
टोलके स्थानीयहुक्रनके लाग खाने पानी फेन समस्या रहल उहाँ बटैटी आभिनसम नलके पानी प्रयोग कैना बाध्य रहल बटैले ।
‘टोलके विकासके लाग आभिन फेन कौनो निकायसे चासो डेहल नाइ डेखजाइठ्,’ उहाँ कहलै– ‘टोलमे खानेपानीके समस्या रहल बा, बर्सातमे डगरामे हिलाकिचा होके आवतजावत कैना समस्या रहल रहठ्, सडकमे ग्राभेलके आवश्यकता रहल बा ।’
वडा नम्बर ४ से भर दुई आर्थिक बरसमे भर नालाके लाग क्रमागत बजेट विनियोजन करल उहाँ बटैलै । उहीसे उहाँ करिब डेढसय मिटर नाली किल निर्माण हुइल सुनैलै ।
टोलके औरे स्थानीय शंकर चौधरी आपन टोलहे नेताहुक्रनके चुनावी भोट बैंकके रुपमे किल प्रयोग करल बटैलै । चुनावके बेला टोलमे खानेपानी, सडक स्तरोन्नतीके नारा सुनैलेसे फेन जीतके गैलपाछे टोलमे घुमके नाइ अइना उहाँ बटैलै ।
कैलारी टोल ओ शिवपुरी धाम जोर्ना कैलाली नालामे रहल काठेपुल मर्मत करटी उहाँ आपन टोलके स्थानीयहुक्रनहे सक्कु नेता खाली भोट बैंकके रुपमे प्रयोग करल बटैलै ।
चुनावके बेला नेताहुक्रे उ ठाउँमे पक्की पुलके आश्वासन डेलेसे फेन कौनो नेता ओकर लाग पहल नाइ करल उहाँ बटैलै । पुल नाइहोके बर्सातमे उ डगरा हुइटी स्कूल जउइया स्कुले विद्यार्थीनहे ढिउर समस्या पर्ना फेन उहाँ बटैलै ।
‘चुनावके बेला नेताहुक्रे आके सडक पिच करब, टोलमे खाने पानीके व्यवस्था करब, नालामे पक्की पुलके व्यवस्था करब कठै, मने जीतके गैलपाछे सक्कु जैसिन नेता आपन डेहल आश्वासन बिस्रा जैठै,’ शंकर कहलै, ‘हमार समस्या आभिन जहाँके टही बा । मने उ समस्या समाधानके लाग आभिन कोइ चासो नाइ डेले होवई ।’
यहोर उपमहानगरपालिकासे सक्कु टोलके विकास कैटी जैना जनैले बा । कलेसे उपमहानगरपालिकासे भूमिहीन सुकुम्बासी ओ अव्यवस्थित बासोबास करटी रहलहुक्रनके लगत संकलन ओ प्रमाणीकरणके लाग इकाइ फेन स्थापना करसेक्ले बा ।
उपमहानगरपालिकासे नगरमे रहल भूमिहीन सुकम्वासी ओ अव्यवस्थित बसोवासीके पहिचान, लगत संकलन ओ प्रमाणीकरण कैके ऐलानी ओ प्रति जग्गामे बैठलहुक्रनहे लालपुर्जा उपलब्ध करैटी हाली करके दायरामे लन्ना जनैले बा ।
