नेकपामे कोइ पाछे नाइ परीः मन्त्री भट्ट
पहुरा समाचारदाता
धनगढी, २२ पुस । उद्योग, वाणिज्य तथा आपूर्तिमन्त्री लेखराज भट्ट आब नेकपामे कोइ किहुहे पाछे नाइ पर्ना बटैले बाटै ।
नेकपा ओली पक्षके सुदूरपश्चिम प्रदेश स्तरीय चौथो बैठकके उद्घाटनमे सम्बोधन करटी उहाँ कहलै– ‘आब अपनेहुक्रे फेन नेतृत्वमे आइ सेकबी ओ हम्रे छोर्ना फेन तयार बाटी । मने, अपनेहुक्रे काम करे सेके परल । आब अपनके कामसे अपनेनहे आघे बह्राइ ।’
पुस २४ गते धनगढीमे हुइना कार्यक्रममे हरेक नेता, कार्यकर्ताके मूल्यांकन कैना फेन मन्त्री भट्ट बटैलै । ‘आब केकर क्षेत्रसे कत्रा मनै अइलै, ओकर फेन मूल्यांकन हुइ,’ उहाँ कहलै ।
कार्यक्रममे श्रम, रोजगार तथा सामाजिक सुरक्षा मन्त्री गौरीशंकर चौधरी आगामी निर्वाचनमे नेकपा प्रधानमन्त्री केपी शर्मा ओली समूह २ तिहाई मत प्राप्त कैना दाबी करलै । आगामी बैशाखमे चुनाव हुइना दाबी करटी उहाँ प्रचण्ड–नेपाल समूह स्वार्थ नाइ मिलके अलग हुइल आरोप लगैलै ।
