मन्त्री चौधरीके पुत्ला दहन ओ करिया झण्डा

पहुरा समाचारदाता
सुखड, २३ पुस । कैलालीके सुखडमे श्रम रोजगार तथा सामाजिक सुरक्षा मन्त्री गौरीशंकर चौधरीके पुत्ला दहन ओ करिया झण्डा डेखाइल बा ।

पूर्वपश्चिम राजमार्ग अन्तरगत कैलालीके घोडाघोडी नगरपालिकाके सुखडमे मन्त्री चौधरीहे प्रचण्ड–नेपाल समूहके अनेरास्ववीयूके विद्यार्थी करिया झण्डा डेखैनाके साथे पुत्ला दहन करल हुइट ।

अनेरास्ववियसे दुसरा चरणके आन्दोलन अन्तर्गत मंगरसे सरकारके मन्त्रीहे करिया झण्डा डेखैना कार्यक्रम सार्वजनिक करले रहे । उहे कार्यक्रमअन्तर्गत नै मन्त्री चौधरीहे करिया झण्डा डेखाइल ओ पुत्ला दहन करल अनेरास्ववीयू कैलाली जनैले बा ।

संसद् विघटन हुइलपाछे चौधरी श्रम रोजगार तथा सामाजिक सुरक्षा मन्त्रीमे नियुक्त हुइल हुइट । उहाँ कैलाली क्षेत्र नम्बर ३ से प्रत्यक्ष निर्वाचित प्रतिनिधिसभा सदस्य हुइट ।