‘जेलमे रहल थारु नेतन्के लाग कुछ नैकरे सेकब’
पहुरा समाचारदाता
धनगढी, २५ पुस । प्रधानमन्त्री केपी शर्मा ओली लम्मा समयसे आन्दोलनरत थरुहट÷थारुवान आन्दोलनकारी प्रति कडा रुपमे प्रस्तुत हुइल बाटै ।
नेकपा ओली समूहसे धनगढीमे आयोजित जनसभाहे सम्बोधन करटी प्रम ओली जेलमे रहल नेताहुक्रनके लाग कुछ करे नाइ सेक्ना बटाइल हुइट ।
‘यहाँ जात–जातके बीचमे मारमारके अवस्था लन्लै । टीकापुर काण्डके टमान ढंगसे रचना करगैल । नक्कली मनै लन्लै, उचल्लै, जनताके बीचमे कोइ थारुके नारा लगाइल, कोइ पहाडियाके ।
जनता–जनतामे विभाजन लन्ना खोज्लै,’ उहाँ आघे कहलै, ‘अब्बे फेन कतिपय थारु नेता जेलमे बाटै । किहुहे वारेन्ट हुइ । इ सक्कु हम्रे हेरटी रहल बाटी । पहिले नै अदालती प्रक्रियामे जासेकल, पहिले नै असहज रुपमे फससेकलहे किनारामे नैलगाके कुछ करे नाइ सेकजाइ, कानुनी हिसाबसे ।’
ओस्टके, प्रम ओलीसे पहिचानके राजनीति कैके विध्वस मचैना काम हुइटी रहल समेत टिप्पणी करले बाटै । तराईमे जारी पहिचानके राजनीतिहे रुवान्डा नरसंहार सँगे जोर्टी प्रम ओली थारु जातिहे विकासमे सरकारहे सहयोग करे पर्ना समेत बटैलै ।
