१४ करोडसे ढिउर बचत तथा २३ करोड ऋण प्रवाह
पहुरा समाचारदाता
धनगढी, २५ पुस । नमस्ते बचत तथा ऋण सहकारी संस्था लिमिटेडसे १४ करोडसे ढिउर बचत कैनाके साथे २४ करोडसे ढिउर ऋण प्रवाह करले बा ।
शनिच्चरके रोज हुइल सहकारीके १८ औं साधारण सभामे सहकारीके अध्यक्ष जगतराम चौधरीसे सुनाइल बार्षिक प्रतिवेदन अन्सार सहकारी २०७७ असार मसान्तसम १४ करोड १९ लाख ६ हजार ४८७ बचत करले बा कलेसे २४ करोड ९३ लाख २२ हजार ४२९ रुप्या ऋण प्रवाह करले बा ।
उहे आर्थिकके असारमसान्तसम सहकारीके २ करोड २६ लाख ७८ हजार रुप्या सेयरपुँजी रहल सहकारीमे अब्बे ५ हजार २२९ सेयर सदस्य रहल बाटै ।
सहकारीके अध्यक्ष जगतराम चौधरीके घरगोसियाइमे हुइल कार्यक्रमके बर्का पहुना धनगढी उपमहानगरपालिकाके नगरप्रमुख नृपबहादुर वड रहल रहिट ।
कार्यक्रमके पहुनामे राष्ट्रिय सहकारी बैंकके धनगढीके प्रवन्धक कृष्ण रावल, नमस्ते बचत तथा ऋण सहकारी संस्थाके पूर्व अध्यक्ष तथा घोरीघोरा लघुवित्त वित्तीय संस्थाके अध्यक्ष प्रभातकुमार चौधरी, वडा नम्बर ८ के वडाध्यक्ष नारायण बराल लगायत शुभकामना व्यक्त करल रहिट ।
कार्यक्रममे सहकारीके लेखा सुपरिवेक्षण समितिके संयोजक रामदास चौधरी सहकारीके आन्तरिक लेखा परिक्षण सुनाइल रहिट । कार्यक्रमके सञ्चालन सहकारीके सचिव जीवन चौधरी करल रहिट ।
कार्यक्रममे सहकारीके सञ्चालक समितिके पदाधिकारी, सेयर सदस्य, कर्मचारी लगायतके उपस्थिति रहल रहे ।
