सुदूरपश्चिममे घट्लै सक्रिय संक्रमित

पहुरा समाचारदाता
धनगढी, ६ माघ । कोरोनाके उच्च जोखिम रहल सुदूरपश्चिम प्रदेशमे पाछेक समय सक्रिय संक्रमितके संख्यामे कमी आइल बा ।

लावा संक्रमण दर ओ परीक्षण घटलसंगे सक्रिय संक्रमितके संख्या घटल हो । सामाजिक विकास मन्त्रालयसे सोम्मारके जारी करल सूचना अनुसार इ प्रदेशमे हाल सक्रिय संक्रमितके संख्या एक हजार ५१२ रहल बा । गत पुसमे सक्रिय संक्रमितके संख्या दुई हजार पाँच सयके हाराहारीमे रहल रहे ।

पाछेक समय लावा संक्रमण दर घटल आ इहीसे आघेक संक्रमित चोखाइल ओरसे संक्रिय संक्रमितके संख्या घट्टी गैल हो । आब अछाममे ७०, बैतडीमे ८०, बझाङमे २२०, बाजुरामे ५९, डडेल्धुरामे ११७, दार्चुलामे ६३, डोटीमे १७१ सक्रिय संक्रमित रहल मन्त्रालय जानकारी डेले बा । ओस्टके, कैलालीमे ५५८, कञ्चनपुरमे १२७ जाने सक्रिय संक्रमित रहल बाटै । इ प्रदेशमे परीक्षण होके यहोरे रहल अन्य जिल्लाके सक्रिय संक्रमितके संख्या ४८ रहल मन्त्रालय जनैले बा ।

सुदूरपश्चिम प्रदेशमे हालसम एक लाख ३४ हजार ५३१ जनहनके पीसीआर विधिसे स्वाब परीक्षण हुइल बा । जौन मध्ये १३ हजार ८९६ जनहनमे कोरोना संक्रमण पुष्टि हुइल बा । कोरोना पुष्टि हुइल मध्ये १२ हजार ३२९ जाने चोखासेकल मन्त्रालयके स्वास्थ्य महाशाखा प्रमुख नरेन्द्रसिंह कार्की जानकारी डेलै ।

सुदूरपश्चिम प्रदेशभर कोरोनाके कारण ज्यान गुमुइयाके संख्या ५५ पुगल मन्त्रालय जनैले बा । कैलालीके २९, कञ्चनपुरके १०, बैतडी, बझाङ ओ डडेल्धुराके तीन/तीन जाने कोरोना संक्रमणपाछे ज्यान गुमा सेकल बाटै । ओस्टके, अछाम, बाजुरा ओ दार्चुलाके दुई/दुई, डोटीके एक जाने कोरोना संक्रमणके कारण ज्यान गुमासेकल बाटै ।