थारु सलिमा बिराके छायांकन सुरु
पहुरा समाचारदाता
धनगढी, ६ माघ । कुछ दिन आघे शुभमुर्हत हुइल थारु सलिमा बिराके मंगरसे छायांकनके काम सुरु हुइल बा ।
सलिमा कृष्णपुर नगरपालिका–६, सिंहपुर गाउँमे छायांकन सुरु हुइल हो । कृष्णपुर नगरपालिकाके नगरप्रमुख कर्ण हमाल रिबन काटके सलिमाके छायांकनके उद्घाटन करल रहिट । कार्यक्रमके पहुनामे वडा नं. ६ के वडा अध्यक्ष नत्थु चौधरी, गायिका सोमती थारु, सलिमाके डाइरेक्टर सुधराम दहित, असिस्टेन्ट डाइरेक्टर आर्दश महतो, महिमा कुश्मी, सुनिता चौधरी लगायत रहल रहिट । कार्यक्रममे स्वागत मनतब्य राष्टिय थारु कलाकार मञ्चके अध्यक्ष विनय वैध करल रहिट ।
हमार म्युजिक बगिया ओ विन्दास मिडियाके प्रोडक्सनमे निर्माण हुइटी रहल सलिमाके प्रोडक्सन म्यानेजर फेरु चौधरी ओ बालकृष्ण चौधरी रहल बाटै । सलिमाके स्क्रीप्ट लेखन सुवेश कठरियाके रहल बा कलेसे क्यामेरामे साहिल चौधरी रहल बाटै ।
सलिमाके नायकनायिकाके भूमिकामे बीर चौधरी ओ सामु चौधरीके अभिनय रहना जनाइल बा । कलेसे खलनायकके भूमिकामे विनय वैधके रहना जनाइल बा ।
