घुरहा पुल मर्मतमे ध्यान डेउ

कैलालीके कैलारी गाउँपालिका–४, के गाउँ ओ वडा नम्बर ६ धर्मापुर, भगतपुर जोरना घुरहा पुलके पुर्वक भाग ढसल पाँच महिनासे ढेर हुइलेसे फे सरोकारवाला निकायके ध्यान नइ गैल हो ।

कृषि सडक अन्तर्गत पर्ना उ पुलके पुर्वक भाग ढसल कारण भारी दुर्घटना हुई सेक्ना कहटी मर्मतके लाग स्थानीयबासीनसे माग करलेसे फे सुनुवाई हुई नइ सेकल हो । पुलके आघेक भागके चौडाईके आधासे ढेर भागके माटी बर्खाहा पानीसे पुहाके खटहा बनैले बा । यकर कारण चार पहियाके गाडी वारपार कैना फे कर्रा बा ।

पहिले–पहिले हुलाकी सडक उहे डगर छिरे । साविक हसुलिया, पवेरा, रतनपुर, बसौटी, उदासीपुर, गदरिया गाविसके स्थानीयहुक्रे कैलालीके सदरमुकाम धनगढी अइना जइना उहे डगर बेल्सिट । उ डगर ढेर चल्टु, छोट ओ सोझ फे परे । उ ठाउँमे पहिले पुल नइ बनल कारण बर्खाके समयमे लाउमे रुप्या टिरके लडिया नाघे पर्ना ओ और बेला कठुवक संघुवामे फे पैसा टिरे पर्ना स्थानीयके बाध्यता रहे ।

अब्बे हुलाकी सडक डुसरओर छिरल । पक्की सडक हुइलक कारण ओहरे चल्टु डगर बनगैल । मने के गाउँ ओ धर्मापुर जोरना पुल ढिला बनल, कच्ची डगर हुइल कारण खासे चल्टु नइ हुइल । चल्टु नइ हुइल कारण इ डगरके पुल प्राथमिकतामे नइ परल । पुलके आघेक भाग ढसके दुर्घटना हुइना सम्भावना बा, नेंगघुम कैना कर्रा बा, मने मर्मत कैनामे हेल्हा काहे करजाइटा ।

स्मरण रहे, पुल बनल करिब ५÷६ वर्ष हु गैल । किनार–किनारमे पंखी बनाके ढुङगा भरान नइ करल हो । बर्खाहा पानीसे पुहा लैजैना माटी भरान करके नेंग्ना डगर केल बनाइल कारण भुरभरे माटीहे बर्खाहा पानीसे सहजुले पुहा लैजाइठ ।

यहाँ सम कि पुल निर्माण करल सूचना बोर्ड फे नइ हो । घुराहा पुल लिखल बोर्डमे पुलके लम्बाइ–एक सय २५ मिटर ओ स्पान संख्याः–५ लिखल सूचना बोर्ड केल बा । पुल निर्माण करल समय, लागत ओ के बनाइल हो ओकर जानकारी बोर्ड नइ हो ।

कैलारी गाउँपालिका मर्मतके लाग बजेट नइ रहल ओ प्रदेश सरकारके प्रदेश सभा सदस्य वीरमान चौधरी उ पुल संघीय सरकारसे बनाइल कारण मर्मत फे उहे कैना कहटी पन्छटै । आखिरमे यकर मर्मतके जिम्मा केकर हो टे ? सरोकारवालाके तुरुन्त ध्यान जाए ।