कञ्चनपुरके ८ किसान पुरस्कृत
सागर कुस्मी
कञ्चनपुर, ९ माघ । कञ्चनपुर जिल्लाके कृष्णपुर नगरपालिका–८, राजघाट गाउँक् ८ किसान पुरस्कृत हुइल बाटैं ।
मोहना तरकारी कृषक समूहके १४ ओं वार्सिक उत्सव के अवसरमे ८ किसान लोग गजेन्द्र चौधरी कृषक पुरस्कारसे पुरस्कृत हुइल हुइँटैं ।
पुरस्कृत हुउइयामे राजघाट कञ्चनपुरके भानुभक्त चौधरी, पवित्रा चौधरी, बलवीर चौधरी, मानबहादुर चौधरी, वीरेन्द्र चौधरी, बुद्धिराम चौधरी, गुरुप्रसाद चौधरी, कमल चौधरी हुइँटै ।
पुरस्कारमे कृषि औजार ओ प्रमाणपत्र पैलैं कलेसे पवित्रा चौधरीहे नगद दुई हजार पाँच सौ पाँच रुपिया फेन पैलैं ।
कार्यक्रममे हेमराज ओझा, जयसिंह बिष्ट, काशी भाट, उमेश चौधरी, भक्तबहादुर चौधरी, लगायत अपन समसमायिक बात बट्वैले रहैं । वक्ता ओइने कृषि पेशा से धेर आम्दानी हुइना हुइलेक ओरसे स्थानीय ओइन कृषिमे जाँंगर लगाके पस्ना चुहाइ सेक्लेसे टीना खेतीसे सोंचल हस पैसा कमाइ सेक्जाइठ ।
ओस्टेके गजलकर तिलक डंगौरा, चुलबुल कुस्मी, ममता चौधरी, राजेश अंगरहुवा लगायत स्रस्टा सन्देश मुलक गजल सुनैले रहैं ।
समुहके अध्यक्ष दुना चौधरीके घर गोसियाइमे हुइल कार्यक्रममे स्वागत मन्तव्य कोषाध्यक्ष कमल चौधरी ओ संचालन करन चौधरी कैले रहैं । इ कृषक समुह हरेक साल अस्टे अस्टे कार्यक्रम कर्टी आइल बा ।
