ठगी कार्यमे संलग्न फरार पक्राउ
पहुरा समाचारदाता
धनगढी, १० माघ । ठगी मुद्दामे फरार कैलालीके गौरीगंगा नगरपालिका वडा नम्बर ८ बैठना ३४ वर्षके राजाराम चौधरी पक्राउ परल बटै ।
धनगढी उपमहानगपालिका वडा नम्बर १ बैठना अनिता चौधरीके भारत बैंगलोरसे बिएस्सी नर्सिङ पास करल प्रमाणपत्र त्रिभुवन विश्वविद्यालय काठमाडौंसे मान्यता डेहुवाइक लाग कहिके प्रलोभनमे पारके पैसा पठाई डेना कहिके राजाराम फरार रहल प्रहरी जनैले बा ।
उहाँ पाँच लाख ठगी करके सम्पर्क बिहिन रहल जाहेरी दरखास्त आधारमे ठगी शीर्षकमे मुद्दा दर्ता हुइलपाछे फरार हुइल रहिट । राजारामके खोज तलासके लाग यी कार्यालयसे खटल विशेष प्रहरी टोली माघ ९ गते जिल्ला कैलाली लम्कीचुहा नगरपालिका–९, धनचैया भाटुक घर नुकछिपके बैठल अवस्थामे पक्राउ करके ठप अनुसन्धानके लाग यी कार्यालयमे नानल उहे कार्यमे संलग्न जिल्ला कैलाली कैलारी गाउँपालिका वडा नम्बर ९ बैठना बर्ष ३३ के शिवकुमार चौधरीहे २०७७ माघ ५ गते पक्राउ करके अदालतसे म्यादथप अनुमति लेहे अनुसन्धान हुूइटी रहल प्रहरी प्रवक्ता प्रतिक विष्ट जनैले बा ।
राजारामके पुर्व ठगी अपराध
२०७३ अगहन ९ गते राजाराम चौधरी जिल्ला कैलाली धनगढी उपमहानगरपालिका वडा नम्बर ८ स्थित सिटिईभिटिसे अनुमति लेहल कहिके अभिभावक तथा विद्यार्थीहुकनहे झुक्याके मल्टिस्किल ईन्टिच्युट अफ टेक्नोलोजी प्रालिमे भर्ना लेके अध्ययन करैटी रहलमे उ प्रालि अनुमति विना गैरकानुनी रूपमे संचालन करके ईन्टिच्युट अध्ययनरत ११८ जनहनहे झुक्याई उन्नचास लाख अठाईस हजार चार सय पन्चानब्बे ठगी करल जाहेरी दरखास्तके आधारमे निजलहे ठगी शीर्षकमे मुद्दा दर्ता करके सक्कु अनुसन्धान कार्यपुरा पश्चात सम्मानित कैलाली जिल्ला अदालतके २०७४ चैत १४ गतेक फैसलासे २ महिना कैद तीन लाख अठ्ठाईस हजार चार सय पञ्चानव्वे जरिवना हुइल रहे ।
२०७५ अगहन ४ गते से २०७६ भदौ ७ गतेसम बार बार जिल्ला कैलाली धनगढी–०८ स्थित मल्टिस्किल ईन्टिच्युट अफ टेक्नोलोजीमे विद्यार्थीहुकनके भर्ना शुल्क ओ मासिक शुल्क करके उन्नाईस लाख पैसठ्ठी हजार चार सय चौध ठगी करके फरार हुइल कना जाहेरी दरखास्तके आधारमे मुद्दा दर्ता करके यी कार्यालयसे सक्कु अनुसन्धान कार्य पुरा करके मुद्दा कैलाली जिल्ला अदालतमे पेश हुसेकल बा ।
