भुईयाँफाँटाके भलमन्सामे दुलारे चौधरी चयन
पहुरा समाचारदाता
धनगढी, १० माघ । कैलालीके कैलारी गाउँपालिका–७ भुईयाँफाँटा गाउँके भलमन्सामे दुलारे चौधरी चयन हुइल बाटै ।
शनिच्चरके हुइल गाउँके खोज्नीबोज्नी (भेला) से एक बरसके लाग चौधरीहे सर्वसम्मतसे भलमन्सामे चयन करल हो । माघ टिहुवार ठनसे नै थारु समुदायमे भलमन्सा चयनके कार्य हुइटी रहल बा । गाउँघरमे विकासके कार्य, भोजभतेर लगायतमे भलमन्साके नेतृत्वदायी भूमिका रहना करठ् । ओस्टके, सामान्य वादविवाद फेन भलमन्सा गाउँघरमे मिलैना कार्य करटी आइल बाटै ।
ओस्टके, भेलासे अघरियामे बिन्तीराम चौधरी ओ गाउँके सचिवमे रामबहादुर सत्गौंवाहे चयन करल बा । भलमन्साके अनुपस्थितिमे अघरियाहे कार्यबाहक भूमिका निर्वाह कैना करठै । ओस्टके, सचिवसे गाउँके बरसभरके हरहिसाब राख्न करल जनाइल बा । चौकीदार भर पुरानेहे निरन्तरता डेहल गाउँके निवर्तमान सचिव फूलराज चौधरी जानकारी डेलै ।
भुईयाँफाँटाके लावा नेतृत्व चयन हुइलपाछे इहीसे आघे कुछ बरसम भलमन्साके जिम्मेवारी निर्वाह करल फिरुराम चौधरी, अघरिया पिथुराम चौधरी ओ सचिव फूलराज चौधरीहे स–सम्मान विदाइ करल बा । भुईयाँफाँटा गाउँमे करिब पाँच सय घरपरिवारके बसोबास रहल बा । कैलालीमे ढिउर परिवारके बसोबास रहल गाउँमध्येके इ फेन एक हो ।
