थरुहट मोर्चोके कैलाली केन्द्रित आन्दोलन
फागुन १५ ओ १६ गते धनगढीमे हजारौं युवादस्ता उटर्ना चेतावनी
पहुरा समाचारदता
धनगढी, ११ माघ । थरुहट/थारुवान राष्ट्रिय मोर्चासे धनगढीमे ५० हजार युवा उटारके शक्ति प्रदर्शन कैना हुइल बा ।
मोर्चासे टीकापुर घटना मुद्दामे उच्च अदालत दिपायलस करल फैसला ओ प्रतिनिधि सभा विघटन विरुद्ध फागुन १५ ओ १६ गते धनगढीमे कम्ब्याट ड्रेसमे ५० हजारके संख्यामे युवा उटारके शक्ति प्रदर्शन कैना चेतावनी डेहल हो ।
अँट्वारके धनगढीमे आयोजित पत्रकार सम्मेलनमे मोर्चाके केन्द्रीय प्रवक्ता मीनराज थारु कहलै, ‘हमारउपर राज्यसे निरन्तर दमन जारी बा । विद्रोहके तयारीमे बाटी । धनगढी नै हब हो । कम्ब्याट ड्रेससहित ५० हजार युवा दस्ता प्रदर्शन करब ।’
कानुनी लडाइके क्रममे सर्वोच्च अदालत जैना ओ सडक संघर्ष कैना बटैटी प्रवक्ता थारु आब आपनहुक्रनके आन्दोलन धनगढी ओ टीकापुर केन्द्रित हुइना उल्लेख करलै ।
‘हम्रहीनहे असाह्य हुइल बा । आन्दोलन आब प्रतिरोधात्मक ओ प्रतिकात्मक रही । सरकारहे असहयोग हुइ । सरकारहे असफल बनाब । अन्तिम विद्रोहके तयारी नै हो,’ उहाँ कहलै ।
टीकापुर घटनाहे छानविन कैना गठित गिरिशचन्द्र लाल आयोगके प्रतिवेदनहे आधार बनाके राजनीतिक घटनाके रुपमे सम्बोधन हुइ पर्ना ओ कैद सजाय सुनाइल नेता तथा कार्यकर्ताहे रिहाइ करे पर्ना माग आपनहुक्रनके रहल ओहकान कहाइ रहे ।
पुस २ गते उच्च अदालत दिपायलसे इहीसे आघे जिल्ला अदालत कैलालीके फैसलाहे उल्ट्याइटी मोर्चाके केन्द्रीय संयोजक लक्ष्मणसहितहे जन्मकैद फैसला सुनाइल रहे । उ फैसला विरुद्ध मोर्चा विरोधमे उत्रल बा ।
आपनहुक्रनके राजनीतिक लडाइहे जातीय दृष्टिकोणसे फेन पहिचान ओ अधिकार प्राप्तिके आन्दोलनके रुपमे हेरे पर्र्ना समेत प्रवक्ता थारुके कहाइ रहे ।
संविधान लेखनके क्रममे २०७२ भदौ ७ गते कैलालीके टीकापुरमे थरुहट आन्दोलनकारी ओ प्रहरीबीच दोहोरो झडप होके ८ प्रहरीके ज्यान जैना मेरके टीकापुर घटना घटल रहे ।
यदि राज्यसे भदौ ७ गतेके घटनाहे आपराधिक ठहर करले बा कलेसे भदौ ८ गते कर्फ्यूके समयमे थारुहुक्रनके घर, पसल, एफएममे आगजनि करुइयाहे फेन कानुनी दायरामे लाने पर्ना मोर्चाके जोड रहल बा ।
