केपी सरकार किर्ते सरकारः रावल
पहुरा समाचारदाता
धनगढी, ११ माघ । नेपाल कम्युनिस्ट पार्टी (प्रचण्ड–नेपाल समूह) के सुदूरपश्चिम इन्चार्ज भीम रावल अब्बेक सरकार केपी सरकार नइहुके किर्ते सरकार रहल आरोप लगैले बटै ।
अँट्वारके नेकपासे धनगढीमे आयोजना करल पत्रकार सम्मेलनमे नेता रावल अइसिन आरोप लगाइल हुइट । ‘प्रधानमन्त्री जी राष्ट्रपतिहे पत्र लिखलेसेफे संविधानके धारा कौनो उल्लेख करल नइहो,’ रावल कहलै, ‘राजपत्रमेफे नक्कली रुपमे पहिलेक मिति धारल बा । सरकार अपनही किर्ते काम कैना । आब केपी सरकार नइहो किर्ते सरकार हो ।’
उहाँ प्रतिनिधिसभा विघटनपाछे बहुमत सदस्य रहल अपन पक्ष आधिकारिक रहल बटैटी निर्वाचन आयोगसेफे बहुमत सदस्यके पक्षमे निर्णय लेना विश्वास व्यक्त करलै ।
प्रधानमन्त्री ओलीके कदमविरुद्ध माघ १७ गते धनगढीमे विरोध सभा कैना फे रावल जानकारी करैलै । उहाँ प्रतिनिधि सभा विघटनविरुद्ध हुइना विरोध सभाहे सम्बोधन कैना पुष्पकमल दाहल प्रचण्ड ओ माधवकुमार नेपाल धनगढी अइना बटैलै ।
यी आघे धनगढीमे नेकपा (ओली समूह) से धनगढीमे सभाके आयोजना करल रहे । सभाहे प्रधानमन्त्री केपी शर्मा ओली सम्बोधन करल रहिट ।
