युवा शक्ति ओ थरुहट आन्दोलनके तयारी

२०७२ भदौ ७ ओ ८ गते टीकापुर आन्दोलनके पाछे थरुहट/थारुवान आन्दोलनके भौगर बुट गइल हस रहे । काजेकि शासकलोग थारु समुदायके मनैन् छान छान पकरके, ढरपकर कइके साटो हेरुवा डेले रहिट । मने करिब ४२ मैन्हक जेल जिन्गि पाछे लक्ष्मण थारुके अग्वाइमे थरुहट/थारुवान मोर्चा बनके आन्दोलनके भौगर फेन डोस्रे टट्लाइ लागल रहे । आन्दोलनके भौगर फेन डोस्रे बुटाइक लग हुइ सायड इहिसे पहिले ३ बरस किल सजाय टोकगइल लक्ष्मण थारुहे सरकारि निर्देसन अनुरुप उच्च अदालत दीपायलसे आजीवन जेल सजाय टोकगइल बा ।

आन्दोलन कर्बो टे जेल जाइ परठ । इहे मानसिकता डेरा जमइले बा बहुट जनहनके मनेम । काजेकि सरकारके रवैया फेन उहे मेरिक बटिस । यकर मतलव आन्दोलन नइ कइके चिमाइल बैठ्ना टे ? थारुन्के छाता संगठन थारु कल्याणकारिणी सभा (थाकस) के केन्द्रके अग्वनके मनस्थिति अभिन सम चिम्ठाइल बटिन । मने इहे बिचेम थरुहट/थारुवान आन्दोलन मोर्चा फेन डोस्रे जग्टि बा । आन्दोलनके भौगर खिटकोर्टि बा ।

मोर्चासे टीकापुर घटना मुद्दामे उच्च अदालत दीपायलसे करल फैसला ओ संसद विघटन विरुद्ध फागुन १५ ओ १६ गते धनगढीमे कम्ब्याट ड्रेसमे ५० हजारके संख्यामे युवा उटारके शक्ति प्रदर्शन कैना चेतावनी डे गइल बा । मोर्चाके प्रवक्ता मिनराज चौधरीके अन्सार कानुनी लडाइके क्रममे सर्वोच्च अदालत जैना ओ संगसंगे सडक संघर्ष कैना बाहेक आउर उपाय नइ हो । मोर्चाके आबके आन्दोलन धनगढी ओ टीकापुर केन्द्रित हुइना कहि गइल बा ।

मोर्चाके आबके आन्दोलन धनगढी ओ टीकापुर केन्द्रित हुइना टे पलि बा । मने आन्दोलनके धुवा देशभर सुल्गक चाहि । नइ टे शासकलोग सुनुइया नइ हुइट । देशभर आन्दोलन ढुंगारक लग मोर्चा ओ थाकसके सहकार्य अपरिहार्य बा । लक्ष्मण थारुके रिहाइके पाछे मोर्चा ओ थाकसके सहकार्य हुइ नइ सेकल विडम्वनापुर्न अवस्था रहल । थाकसके सहमहामन्त्री मिनराज चौधरी मोर्चाके प्रवक्ताके जिम्मेवारि लेहल पाछे थाकस उहाँसे स्पस्टिकरन लेहल नजिर बा ।

थाकस थरुहट आन्दोलन अपन अगुवाइमे करक चाहठ । मने आन्दोलनके नाउँ कटि कि पाछे हटठ । अपन सहमहामन्त्री थरुहट/थारुवान मोर्चामे संग्लग्न हुइबेर हमार प्रतिनिधि ओहे होंइ कहक छोरके स्पस्टिकरन लेहठ । थरुहट/थारुवान मोर्चासे हुइल आन्दोलनमे नैतिक समर्थन जनैना टे डुरके बाट, उल्टे मोर्चाके कार्यक्रममे ना जाउ कहिके उल्टा रोल खेलठ । असिक कसिक आन्दोलनके गति आगे बह्रि ?

भर्खर नवलपरासीमे हुइल थरुहट/थारुवान संयुक्त संघर्ष समितिके बैठकमे थाकसके अगुवाइमे संघर्ष समिति अभिन जिवित रहल ओर्से मोर्चा विघटन करे पर्ना अडान थाकसके अग्वन लेहल बाट आइल बा ।

अपने आन्दोलनके नाउँमे माछि नइ मर्ना थाकस केन्द्र का हैसियतले मोर्चाहे विघटन कर्ना मागन करे सेकठ ? थरुहट/थारुवान संयुक्त संघर्ष समितिमे थारु सांसदलोगनके फेन मोर्चा रहे । सांसदलोग कहाँसे कहाँ पुग गइलाँ । थाकस अभिन उहे मुँवल समितिम किलनि हस चप्टल बा ।

आन्दोलनके गति देशव्यापि बनइना हो कलेसे थरुहट/थारुवान मोर्चा ओ थाकस नइ मिलके उपाय नइ हो । ओहेसे थाकस फराक ढंगसे सोचे । मोर्चा लचिलो होके थाकससे बाट आगे बह्राए । संयुक्त रुपसे जाइ नइ सेक्लेसे धनगढीमे ५० हजारके संख्यामे युवा उटारके शक्ति प्रदर्शन कैटि सरकारहे खवरडारि कर्ना लगायतके आन्दोलन केवल खोंखे हस किल हुइ ।