बाढपीडित किसानहे चैते धानके बिया
पहुरा समाचारदाटा
टीकापुर, १२ माघ । कैलालीके भजनी नगरपालिकाके किसानहे निःशुल्क चैते धानके बिया वितरण करल बा ।
नगरपालिकाके १ से ९ वडाके किसानहे १०० क्विन्टल चैते धानके बीया निःशुल्क वितरण करल हो । नगरके अधिकांश क्षेत्र डुबानके कारण बर्खे यामके धानबालीके उत्पादन लेहे नैहुइना हुइलपाछे चैते धान खेतीसे नागरिकके खाद्य सुरक्षा सुनिश्चित कैना धानक बीया वितरण करल नगरपालिकाके कृषि शाखा प्रमुख कमल चौधरी बटैलै ।
‘यहाँ बर्सेनि बर्सातमे बाढ आइठ्, यहाँके किसान बर्खे खेती करे नैसेक्ठै, उहेमारे चैते धानके बीया वितरण करली’, कृषि शाखा प्रमुख चौधरी कहलै–‘यहाँ चैते धानके मजा उत्पादन हुइठ् । हम्रे धान खेती कहलपाछे चैते धानहे ढिउर प्रोत्साहन करठी ।’ उहाँ डुबान क्षेत्रके किसानहे प्राथमिकतामे राखके बीया वितरण करल जानकारी डेलै ।
भजनी नगरपालिका ओ कृषि ज्ञान केन्द्र कैलालीके आर्थिक सहयोगमे २२२ हेक्टरमे पुग्ना मेरके २८ कृषक समूह ओ व्यक्तिगतरूपमे चैते धानके बीया वितरण करल बा । ‘किसानके मागके आधारमे बीया वितरण करल हो’, चौधरी कहलै–‘चैते तीन ओ चैते पाँच जातके धानके बीया नगरपालिकासे १५ क्विन्टल ओ कृषि ज्ञान केन्द्रसे ८५ क्विन्टल किसानहे उपलब्ध करैली । इसँगे चैते धान खेतीमार्फत् उत्पादन बह्रैना अन्य कार्यक्रमसमेत सञ्चालन करबी ।’
नगरपालिकामे किसानहे प्रोत्साहन कैना हरेक बरस चैते धान ब्लक प्रदर्शन, चैते धान मुख्यमन्त्री कृषि कार्यक्रम जैसिन कार्यक्रमसमेत सञ्चालन हुइटी आइल बावै । नगरपालिकामे करिब ४०० हेक्टरमे चैते धानखेती हुइना करल बा । नगरपालिका चैते धान खेतीके लाग मजा ओ उर्बर क्षेत्र हो । यहाँके किसान बर्सेनि चैते धान खेती कैना करल बाटै ।
‘बर्खे धान खेतीसे मजा उत्पादन ओ बाढ ग्रसित क्षेत्रके लाग चैते धान खाद्य सुरक्षामे सहयोग पुग्ना हुइल ओरसे नगरपालिका चैते धान खेतीमे सहयोग कैनासे यहाँके किसानहे सजिल हुइल बा’, किसान सुन्दर चौधरी कहलै–‘कृषिमे सरकार लगानी बह्रैले बा ।
भजनीमे बर्सेनि अइना बाढके कारण खेतीयोग्य जमीन ओ बालीमे क्षति पुग्ना करल बा । यहाँके लडिया तथा कटान हुइना क्षेत्रमे स्थायी तटबन्ध कैके खेतीयोग्य जमीन बचैनाओर ध्यान डेहे परल ।’
किसानहे ५० प्रतिशत अनुदानमे कृषि उपकरण
बैतडीके पाटन नगरपालिकासे ५० प्रतिशत अनुदानमे किसानहे मिनिटिलर वितरण करले बा ।
किसानहुक्रनके मागमे आधारित रहीके ५० प्रतिशत अनुदानमे किसानहे मिनिटिलर वितरण करल पाटन नगरपालिकाके कृषि शाखा प्रमुख महेश अवस्थी बटैलै । नगरपालिकासे ५० प्रतिशत अनुदानमे यन्त्रउपकरण प्रदान करक लाग सूचना आह्वान करल ओ उहे सूचनाके आधारमे निवेदन डेहलहुक्रनहे मिनिटिलर वितरण करल उहाँ बटैलै ।
पाटन नगरपालिकासे चालु आर्थिक बरसमे यन्त्र उपकरणमे ५० प्रतिशत अनुदान डेना कार्यक्रम स्वीकृत करल रहे । उहे कार्यक्रम अनुसार ३५ जाने टमान कृषि समूह, सहकारीमे आवद्ध किसानहुक्रनहे उपकरण प्रदान करल नगरपालिका जनैले बा ।
यन्त्र उपकरण खरीदमे नगरपालिकासे ढिउरमे एक यन्त्र बराबर ४२ हजार अनुदान डेना निर्णय करल रहे । किसानहुक्रे यन्त्र खरीद करलपाछे उहाँहुक्रनके खातामे नगरपालिकासे अनुदान रकम जम्मा कैना बटाइल बा ।
