सुदूरपश्चिममे कोरोना विरुद्धके खोप अभियान सुरु, स्वास्थ्य निर्देशक अवस्थी लगैलै पहिल खोप

पुहरा समाचारदाता
धनगढी, १४ माघ । देशभर कोरोना भारइस विरुद्धके खोपके अभियान सुरु हुइलसँगे सुदूरपश्चिममे फेन बुधसे सुरु हुइल बा ।

मुख्यमन्त्री त्रिलोचन भट्ट प्रदेशके रेफरल सेती प्रादेशिक अस्पतालसे कोरोना भाइरस विरुद्धके पहिल चरणके खोप अभियान शुभारम्भ करल रहिट । काठमाडौँसे प्रधानमन्त्री केपी शर्मा ओली भर्चुअल विधिसे खोप अभियान सुरु करलपाछे मुख्यमन्त्री भट्ट फेन उ अभियान शुभारम्भ हुइल घोषणा करल रहिट । सेती प्रादेशिक अस्पतालसहित प्रदेशके ९ ठो खोप केन्द्र मार्फत अभियान सुरु हुइल घोषणा करल बा ।

प्रदेश सरकारसे कोरोना विरुद्धको खोप लगाइक लाग कैलालीके टीकापुर ओ सेती प्रादेशिक अस्पतालहे खोप केन्द्रके रुपमे तोक्ले बा कलेसे प्रदेशका अन्य सक्कु जिल्ला अस्पतालसे फेन खोप लगाजैना बा ।

प्रदेश स्वास्थ्य निर्देशनालयके स्वास्थ्य निर्देशक डाक्टर गुणराज अवस्थी कोरोना विरुद्धके पहिल खोप लगाइल रहिट । भारतसे अनुदानमे उपलब्ध कराइल खोप पहिल चरणमे स्वास्थ्यकर्मी, सुरक्षाकर्मी ओ सरसफाईकर्मीहे लगाजैना प्रदेश सरकार जनैले बा । संघीय सरकारसे सुदूरपश्चिमके लाग कोरोना विरुद्धके ३६ हजार डोज खोप धनगढी पठैले बा ।

अँट्वारके संघीय सरकारके स्वास्थ्य सेवा विभागसे रेफ्रिजेरेटर भ्यानमार्फत प्रदेशके १६ हजार २ सय ९३ जनहनहे लगैना मेरके कोरोना विरुद्धके खोप पठाइल हो ।