हिन्दू राज्यके समर्थनमे प्रदर्शन
पहुरा समाचारदाता
धनगढी, १५ माघ । राजसंस्था ओ हिन्दू अधिराज्यके माग रख्टी धनगढीमे प्रदर्शन करल बा । धर्म साझा, देश साझा ओ राजा साझा कना आह्वानके साथ स्थानीयसे धनगढीमे प्रदर्शन करल हुइट ।
‘राजा आऊ देश बचाऊ, हाम्रो राजा हाम्रो देश, प्राण भन्दा प्यारो छ, हिन्दू राज्य कायम गरौँ,’ जैसिन नारा लगैटी धनगढीके बुद्धचोकसे सुरु हुइल र्याली बजार परिक्रमा कैटी ट्राफिक चौराहमे पुगल रहे ।
हात हातमे नेपालके राष्ट्रिय झण्डा बोकल यूवाहुक्रे नारा जुलुस लगैटी र्यालीमे सहभागी हुइल रहिट ।
‘सुन्दर सुदूरपश्चिम बासी जनता’के आयोजनामे हुइल र्यालीसे नेपालमे राजसंस्थासहितके हिन्दू राज्य कायम कैना दबाब पुग्ना बटैटी आयोजक समितिके ललित जोशी कहलै, ‘वर्तमान संविधान अपूरो ओ इहीसे मौलिक संस्कृतिहे अंगिकार नैकरल ओरसे जनदबाब ओ आन्दोलनसे वर्तमान व्यवस्थाके विस्थापन कैके नेपालमे राजसंस्थासहितके हिन्दू अधिराज्य कायम करक लाग प्रदर्शन करल हुइटी ।’
