सुदूरपश्चिमके भारतसंग जोरल नाखा खुला

पहुरा समाचारदाता
धनगढी, १६ माघ । नेपाल सरकारसे सुदूरपश्चिमके भारतसंग जोरल सक्कु सीमानाका शुकसे खुला करल बा । मन्त्रीपरिषद्के निर्णयके आधारमे गृह मन्त्रालयसे सीमा नाका खुला करल जनैले बा ।

मन्त्रालयके अनुसार कैलालीके गौरीफन्टा, कञ्चनपुरके गडडाचौकी, बैतडीके झुलाघाट ओ दार्चुलाके खलंगा ओ पुलघाट नाका पूर्ण रुपमे खुला करल हो । नाका खुलल्सँगे डुनु देशके नागरिक स्वास्थ्य सुरक्षाके मापदण्ड पालन कैके आब सहज आवतजावत करे सेक्ना बाटै । मने सीमानाकासे टिसरा देशके नागरिकहे भर प्रवेश अनुमति नैडेना मन्त्रालय जनैले बा ।

सरकारसे कोरोना भाइरसके जोखिम रोकथाम तथा नियन्त्रणके लाग कहटी गत चैत १० गतेसे नेपाल–भारत सीमा नाका बन्द करल रहे । ओकरपाछे बीचमे सीमा नाकाके आवागमनहे कुछ सहज बनाइल रलेसे फेन भारतीय नागरिकहे प्रवेश अनुमती डेहल नैरहे ।

सुदूरपश्चिम नाकासंगे देशके पशुपतिनगर (इलाम), काँकडभिट्टा (झापा), रानी (मोरङ), माडर (सिरहा), गौर (रौतहट), वीरगन्ज (पर्सा), रसुवागढी (रसुवा), कृष्णनगर (कपिलवस्तु, बेलहिया (रुपन्देही, जमुनाह (बाँके), गौरीफन्टा (कैलाली), गड्डाचौकी (कञ्चनपुर), खलंगारपुलाघाट (दार्चुला), झुलाघाट (बैतडी), खजुरगाछी (झापा), भन्टाबारी (सुनसरी), कुनौली (सप्तरी), जटही (धनुषा), इनर्वा (धनुषा), भिट्टामोड (महोत्तरी), मलंगवा (सर्लाही), बंकुल (रौतहट), मटिअर्वा (बारा), सिम्रौनगढ (बारा), त्रिवेणी (पूर्वी नवलपरासी), महेशपुर (पश्चिम नवलपरासी), तौलिहवा (कपिलवस्तु, कोइलाबास (दाङ, सुरजपुर (बर्दिया) र तातोपानी (सिन्धुपाल्चोक) नाका फेन खुलल् बा ।