सक्षम छाई सहजकर्तासे अनुभव आदानप्रदान
पहुरा समाचारदाता
धनगढी , १६ माघ । सुरक्षित सिकाई ब्लसम परियोजनासे तयार करल सक्षम छाई शुकके अपने अपने भोगल अनुभव आदानप्रदान करले बटै ।
ब्याकवार्ड सोसाईटी (बेस) नेपालसे आयोजित कार्यक्रममे सक्षम छाई अपनमे कैसिक परिवर्तन आइल कनामे अनुभव बाँटले बटै । अनुभव आदानप्रदान कैना अधिकांससे परियोजनासे अपनेहुकनके जीवनमे परिवर्तन नानडेहल बटैलै ।
सक्षम छाई बहुट मजा करके अनुभवके आदानप्रदान करलै धनगढी उपमहानगरपालिकाके प्रमुख नृपबहादुर वड कहलै, ‘सक्कु छाईनहे यैसिक सक्षम बनाई सेक्लेसे समाज ओ देश सक्षम हुई ।’ छाईनप्रतिके सोचमे परिवर्तन नानेक लाग अभिभावककेफे सहभागिता खोजे परठ नगरप्रमुख वड कहलै, यकर साथे समाजसे विद्यालयमेफे छात्रामैत्री वातावरण तयार करे पर्ना विल्गाइठ । सकारात्मक सोचके साथ काम करलेसे सहजकर्ता छाईनमे आइल परिवर्तन जस्टे औरमेफे परिवर्तन नाने सेक्जाई ।
धनगढी उपमहानगरपालिकाके उपप्रमुख सुशीला मिश्र भट्ट सहजकर्ता बनल सक्षम छाइनहे समाज परिवर्तनके सम्बाहकके रुपमे परिचालन करे सेक्ना बटैली । छाई चेलीहुकनमे बहुट मजा परिवर्तन आइल ओइनके प्रस्तुतीसे विल्गाइठ उपप्रमुख भट्ट कहली, ‘अब यहाँहुक्रे औरमे परिवर्तन नन्नामे सहयोगी हुई परी ।’
कैलालीके गौरीगंगा नगरपालिकाको उपप्रमुख अंचला चौधरी पछिल्का ५ वर्ष यहोर बालिकाके शिक्षामे सुधार आइल बटैली ।
