हो, हम्रे कमुइयाँ भासा बोल्ठि

हम्रे कमुइयाँ हुइ
हो, हम्रे कमुइयैं हुइ
काम कैना मनैयाँ, कमुइयाँ
उहेमारे हम्रे कमुइयाँ हुइ ।
हम्रे कमुइयाँ उट्ठि
कमुइयाँ बैट्ठि, कमुइयाँ खैठि
ओ कमुइयाँ सुट्ठि
का करे कि, कमुइयाँ हमार कला हो
कमुइयाँ हमार रिटभाँट, रहन–सहन हो
ओ कमुइयाँ हमार भासा हो
उहेसे हम्रे कमुइयाँ भासा बोल्ठि ।
हम्रे कमुइयाँ
हमार आपन साँस बा
उहेसे हम्रे हमारे साँस फेर्ठि
हमार आपन ढकढिउरा बा
उहेसे हमार हमारे ढकढिउरा चलठ
ओ हमार आपन जिन्गि बा
उहेसे हम्रे हमारे जिन्गि जिठि
का करे कि,
हमार साँस कमुइया भासा बोलठ
हमार ढकढिउरा कमुइयाँ ढर्कनमे चलठ
उहेसे हम्रे कमुइयाँ हुइ
हम्रे, आपन जिन्गिक कमुइयाँ हुइ
टबेमारे हम्रे कमुइया भासा बोल्ठि ।
कोइ सोचाठुइ
कमुइयन डास हुँइट
कमुइयन गुलाम फेन हुँइट
हो, हम्रे डास फेन हुँइ
गुलाम फेन हुँइ
मनो, हम्रे मालिकके डास नै हुइ
न टे हुइ सासकनके डास
हम्रे टे खालि
आपन जिन्गिक डास हुइ
का करे कि, हम्रे आपन पापि पेटके लाग
माटिमे पस्ना चुहैठि
आपन आँगसे रकट चुहैठि
हो, इहे पस्ना चुहैना
आँगके रकट चुहैना मनैनके भासाहे
सासक कमुइया भासा कठाँ
उहेसे हम्रे कमुइयाँ भासा बोल्ठि ।
कोइ–कोइ जरुर कहाठुइ
कमुइयन मालिकके गुलाम हुँइट
कमुइयन सासकके डास हुँइट
मनो,
छाटिम हाँठ ढइके हेरो
हमार ढकढिउरासे मालिक जियाटटाँ
हमार साँसले सासक साँस फेरटटाँ
हमार रकट ओ पस्ना चुस–चुसके
सासक छुट्टु साँरहस मट्टाइटि बटाँ
ओ हमारे सर्वस्व लुटके
कुटिल सकुनिन फाँडा लगैटि बटाँ
टब्बोपर हम्रे सगर्व
आपन अस्टिट्वमे, आपन माटिमे ठह्र्याके
निसंकोच कमुइयाँ भासा बोल्टि बटि
का करे कि, हम्रे कमुइयाँ हुइ
हम्रे कमुइयाँ भासा बोल्ठि ।
हो, हमार सोनके लंका लुटके
हमार सर्वस्व, हमार जिन्गि लुटके
हमार साँस ओ ढकढिउरासे जिटिरहल
मालिक सासक
ओ सासकके चाटुकारनके आँख
हम्रहिन गुलाम डेखे सेकठ
हम्रहिन डास डेखे सेकठ
का करे कि, चाटुकार ओ चम्चनके हाँठ
सडा मालिकके गुलाम करठ
सडा सासकके डास बनठ ।
हो, हम्रे कमुइयाँ जरुर हुइ
मनो मालिकके गुलाम नै हुइ, डास नै हुइ
का करे कि हमार, हमारे अस्टिट्व
हमार ठन हमारे स्वट्व बा
उहेसे हम्रे कमुइयाँ हुइ
हम्रहिन कमुइया भासा मजा लगठ
उहेक मरे हम्रे कमुइयाँ भासा बोल्ठि ।

दाङ