झोलुङ्गे पुल ओ सडक स्तरोन्नति योजनाके अनुमगन
पहुरा समाचारदाता
हसुलिया, १९ माघ । कैलालीस्थित कैलारी गाउँपालिकाके गाउँपालिका स्तरीय अनुगमन समितिसे अँट्वारके वडा नम्बर ६ ओ ९ मे सम्पन्न हुइल योजनाके अनुगमन करले बा ।
गाउँपालिका स्तरीय अनुगमन समितिके संयोजकसमेत रहल गाउँपालिकाके उपाध्यक्ष लक्ष्मी सत्गौंवाके नेतृत्वमे रहल अनुमन टोलीसे योजनाके अनुगमन करल हो । उ टोलीसे वडा नं ६ खरुवाखेराके निर्माण सम्पन्न हुइल झोलुङ्गे पुल ओ वडा नम्बर ९ सामरचौरामे निर्माण सम्पन्न हुइल झोलुङ्गे पुल ओ सडक स्तरोन्नति योजनाके अनुगमन करल जनाइल बा ।
टोलीसे शनिच्चरके फेन वडा नम्बर १ मे निर्माणाधिन विसनपुर कटान समुदायिक भवन ओ वडा नम्बर २ के दिलबहादुरके पसलसे कैलारी स्पोर्टस्के घरहुइटी लौटनके मेडिकल सडक स्तरोन्नति योजनाके अनुगमन करल रहे ।
अनुगमन टोलीमे समितिके सदस्य रञ्जिता चौधरी, खडक कामी, गाउँपालिकाके योजना शाखा प्रमुख सन्तोषकुमार चौधरी, गाउँपालिकाके प्राविधिक लगायतके सहभागिता रहल रहे ।
गाउँपालिकामे इ बरस १५७ योजना रहल बावै । जौनमध्ये अब्बेसम २७ ठो योजना सम्पन्न हुइल योजना शाखा प्रमुख चौधरी जानकारी डेलै ।
