जोतपुर गाउँम खोज्नीबोझ्नी
पहुरा समाचारदाता
बर्दिया, २० माघ । बर्दियक राजापुर नगरपालिका वडा नम्बर २ भिट्टर पर्ना जोतपुर गाउँम बरघर्यनक खोज्नी बोझ्नी निम्जल बा ।
खोज्नीबोझ्नीम गैल् बरसक आर्थिक ओ प्रगति प्रतिवेदन सुनागैल् रह । प्रतिवेदनम गैल् बरसम कर सेक्लक काम ओ कर निसेक्लक कामक बारेम जनागैल् रह । वाकर पाछ, गाउँक लउव बरघर्या किहिँका चुन्ना ओ सेवा सुविधा कसिन रना, गाउँक किसन्वन कट्रा रकम या धान बुझाई सेक्ना बिषयम फे बखेरी कैगिल् रह ।
यि सालक लाग गाउँक बरघर पुरान बरघर्या वीरेन्द्र दहित, सहायक बरघर्या रमविष्णु थारु ओ सचिब पुर्णबहादुर थारु सहित ७ सदस्यीय कार्य समिति बनागैल् बा । यि सालक बरघर प्रणालीम गाउँक सामाजिक, साँस्कृतिक, धार्मिक कामक सँगसँग कुलापानीक काम फे उह बरघर ह्यार पर्ना निर्णय कैगिल् बा ।
ओसहँक उह खोज्नीबोझ्नीम गाउँक गुर्वा, केसौका ओ चौकिडर्वा फे छनौट कैगिल् रह । गुर्वम ठग्गु थारु,केसौकम मनिराम थारु, चौकिदारम दोङ्ला थारु छनौट हुइल् बाट । बरघर प्रणाली थारु समुदायम थारु गाउँक सामाजिक, साँस्कृतिक, धार्मिक कामक सँगसँग गाउँक विकास ओ सामान्य घटनक मिलापत्र करैना कामक अगुवाई कर्जाइठ् ।
