एकल महिलासे कम्पोष्टेवल सेनेटरी प्याड उत्पादन
पहुरा समाचारदाता
धनगढी, २१ माघ । सुदूरपश्चिम प्रदेशमे पहिलचो एकल महिलासे कम्पोष्टेवल सेनेटरी प्याड उत्पादन शुरु करले बाटै ।
महिलाहुक्रे महिनावारी हुइबर प्रयोग करजैना सेनेटरी प्याडमे प्लाष्टिक मिसावट हुइना ओ प्रयोग करसेकलपाछे प्याड नैसर्ना तथा जराइबर प्रदूषण हुइना हुइल ओरसे मानव अधिकारके लाग महिला एकल महिला सहजे कुहना मेरके कम्पोष्टेवल सेनेटरी प्याड उत्पादन करे लागल हुइट ।
जीआइजेडके आर्थिक सहयोग ओ धनगढी उपमहानगरपालिकाके समन्वयमे कम्पोष्टेवल सेनेटरी प्याड उत्पादन सुरु करल डब्लूएचआरके प्रादेशिक अधिकृत बेद अवस्थी बटैली । उहाँ अन्य सेनेटरी प्याड नैकहना ओ फेँकेबर प्रदूणष हुइना करल बटैटी कहली, ‘हमार उत्पादन करल सेनेटरी प्याड प्रयोग करल ६० दिनभित्रे कुहठ्, जिहीसे वातावरण प्रदूषण नैहुइठ् ।’
ओहकान अनुसार किशोरीहुक्रनके स्वास्थ्य प्रजननहे ध्यानमे राखके पहिलचो धनगढीसे कम्पोष्टेबल सेनेटरी प्याड उत्पादन सुरु करल हो । इ प्याडमे प्रयोग करल सामग्रीमे प्लाष्टिकरहित हुइनाके साथे किशोरीके प्रजनन स्वास्थ्यहे ख्यालमे राखके निर्माण करल बा ।
प्रादेशिक अधिकृत अवस्थी अन्य प्याडके तुलनामे यम्ने रसायनरहीत हुइनाके साथे प्रयोग करेबर सहजता हुइना बटैली । प्लाष्टिकयुक्त सेनेटरी प्याड प्रयोग करेबर सेतो पानी बहना, पाठेघरमे इन्फेक्सन हुइना लगायतके समस्या डेखे लागलपाछे उहीसे मुक्ति डेहुवाइक लाग अपनेहुक्रे कम्पोष्टेवल सेनेटरी प्याड उत्पादन करे लागल बटैली ।
८ पिसके ५० से ६० रुपैयाँसम मुल्य राखके बजारमे लन्ना तयारी रहल बटैटी उद्योगहे व्यवस्थित कैके सञ्चालन कैना स्थानीय निकायसंग सहकार्य हुइटी रहल उहाँ जानकारी डेली ।
‘हमार उत्पादन करल सेनेटरी प्याडहे गुणस्तर प्रमाण चिन्ह प्राप्त कैना प्रक्रिया सुरु करले बाटी, गुणस्तर चिन्ह प्राप्त हुइटी किल बजारमे लानब ।’ इ उद्योगसे एकल महिलाके आयआर्जनमे वृद्धि कैनाके साथे एकल महिलाहे हौसला प्रर्दान हुइना विश्वास रहल अवस्थीके रहल बा । सुरुवाती चरणमे ५ जाने कर्मचारीहे रोजगारी समेत डेहल जनाइल बा ।
