कैलारीके हिँउदे अधिवेशन ओराइल
पहुरा समाचारदाता
हसुलिया, २३ माघ । कैलालीस्थित कैलारी गाउँपालिकाके गाउँ सभाके हिउँदे अधिवेशन शुकके सम्पन्न हुइल बा ।
गाउँपालिकाके अध्यक्ष लाजुराम चौधरीके विशेष सम्बोधनके साथ हिउँदे अधिवेशन सम्पन्न हुइल हो । गाउँ सभाके बैठक गाउँपालिकाके उपाध्यक्ष लक्ष्मी सत्गौंवाके अध्यक्षतामे बैठल रहे ।
बैठकमे सम्बोधनके क्रममे गाउँपालिका अध्यक्ष गाउँ सभा सदस्यहुक्रे आघेक बैठकमे उठाइल विषय वस्तुमे स्पष्ट पारल रहिट । ओस्टके, विषयगत समितिहुक्रे उठाइल विषयमे फेन उहाँ जवाफ डेहल रहिट ।
सम्बोधनके क्रममे अध्यक्ष चौधरी प्रधानमन्त्रीके प्रतिगामी कदमके कारण स्थानीय सरकारमे फेन असर परल बटैलै । उहाँ गाउँपालिकाहे आघे बह्रैना दायित्व सबके रहल उल्लेख करटी गाउँपालिकाके आन्तरिक आय बह्रैना फेन जरुरी रहल उल्लेख करलै ।
ओस्टके, गाउँपालिकासे करल काम डाटा पोर्टलमार्फत सक्कु जाने सहजे हेरे सेक्ना व्यवस्था रहल ओरसे आभिन फेन जनताहे बुझैना आवश्यक रहल बटैलै । उहाँ प्रविधिके प्रयोगमार्फत गाउँपालिकाके सूचना सजिले प्राप्त करे सेकजैना व्यवस्था रहल उल्लेख करटी कहलै– ‘मने, यकर बारेम आभिन फेन बुझे सेकल नैहुइट । हम्रे बुझैना जरुरी बा ।’
गाउँ सभाके बैठकमे गाउँ सभा सदस्य, प्रमुख प्रशासकीय अधिकृत खगेन्द्रराज जोशी, कर्मचारी लगायतके सहभागिता रहल रहे । गैल पुस २७ गतेसे कैलारी गाउँपालिकाके गाउँ सभाके हिउँदे अधिवेशन सुरु हुइल रहे । उ गाउँपालिकाके गाउँ सभासे प्रधानमन्त्री केपी शर्मा ओलीके कदम प्रतिगामी रहल ठहर करले बा ।
