मौसम बडलल पहाडमे हिमपात

शनिच्चरसम पानी ओ हिमपात, अँट्वारसे मौसम खुल्न

पहुरा समाचारदाता
धनगढी, २३ माघ । विफेक रोजसे मौसममे बदलाब आइल बा । पश्चिमी न्यून चापीय प्रणालीके प्रभावके कारण मौसममे बदलाब आइल मौसम पूर्वानुमान महाशाखा जनैले बा । काल्हके दुपहरसे सुदूरपश्चिम प्रदेशमे आंशिक बडरी हुके विफेक रात क्षणिक पानी बरसले बा ।

महाशाखाके अन्सार सकारे पश्चिम नेपालके कुछ ठाउँमे सामान्य वर्षा हुइल बा । उच्च हिमाली क्षेत्रमे हिमपात बिफेक रातसे हिमपात हुइल बा । पानी पर्नाके साथे हिमपात हुइलेसेफे तापक्रममे भर अत्यधिक गिरावट अइना हुइल बा ।

आज दुपहर ओ रातसम्म सुदूरपश्चिम, कर्णाली, गण्डकी प्रदेश, लुम्बिनी प्रदेशके ढेर स्थानमे ओ प्रदेश १ ओ बागमती प्रदेशके कुछ ठाउँमेफे हल्कासे मध्यम वर्षा हुइना जनागिल बा । बडरी हुके पानी पर्ना ओ हिमपात हुइना क्रम (शनिच्चरसम जारी रहना ओ अँटवारसे भर मौसम खुल्न महाशाखाके पूर्वानुमान बा ।

बाजुरामे हिमपात, किसान खुशी

बाजुरामे बिफेक रातसे हिमपात सुरु हुइल बा । भारी हिमपातसंगे अत्याधिक जुरार बह्रल ओरसे यहाँके जनजीवन कष्टकर हुइल बा । ठुल्हके हिमपातके कारण किसान उत्साहित ओ खुशी हुइल बटै कलेसे व्यापारी चिन्तित हुइल बटै ।

समयमे हिमपात ओ वर्षा नइहुके खेतुवामे लगाइल हिउँदेबाली सुक्न हुइल कहटी किसान चिन्तित बनल रहिट । अगहनसे हिमपात हुई पर्नामे यी वर्ष माघ महिनामे केल हिमपात रहल बा । बिफेक रातसे वर्षासंगे हिमपात हुई लागलपाछे किसान खुशी हुइल हुइट ।

नम्मा समयसम पानी नइपरलपाछे लगाइल हिउँदेबाली खेतुवामे सुक्न कहिके चिन्तित बनल यहाँके किसान बर्षासंगे हिमपात हुई लागलपाछे आब बाली सप्रना कहटी ओइने उत्साहित हुइल बटै । ‘यी वर्ष हिउँदे बाली उत्पादन नइहुइना हुइल कहिके भरोसा मारसेकल रही’, बाजुरा गौमुल गाउँपालिकाके किसान मिलन रोकाया कहलै, ‘एक्कासी बर्षासंगे हिमपात हुई लागलपाछे आब हिउँदे बाली उत्पादनमे वृद्धि हुइना आस पलाइल बा ।’

हिउँ ओ पानीसे अन्नबाली सप्रनाके साथे सुक्खा मौसमसे फैसे सेक्ना रोगफे रोक्ना कहटी अपनेहुक्रे खुशी हुइल उहाँक कहाई बा ।

हिमपातसे कृषकमे खुशीयाली नन्लेसेफे यहाँके व्यापारी भर चिन्तित हुइल बटै । भारी हिमपात हुके सडक बन्द हुके सामान ढुवानी बन्द हुई कि कहिके व्यापारी चिन्तित हुइल हुइट । बाजुरा जिल्लाके उप्पर भेगके सामान टरेक भेग सदरमुकाम मार्तडीसे सडक मार्ग हुके अइना हुइल ओरसे ढेर हिमपात हुइलेसे कच्ची सडक बिग्रन ओ पोरखे लेकमे सडक बन्द हुके दैनिक उपभोग्य सामानके अभाव हुई की कहिके व्यापारी चिन्तित हुइल हुइट ।

यहाँके बडिमालिका नगरपालिका, बूढीन्दा नगरपालिका, त्रिवेणी नगरपालिका, गौमुल गाउँपालिका, स्वामिकार्तिक गाउँपालिका, पाण्डव गुफा गाउँपालिका, हिमाली गाउँपालिकाके उप्पर क्षेत्रमे बिफेक रातसे हिमपात हुइटी बा ।