मिस्टर एण्ड मिस थारुके माघ २८ गते धनगढीम अडिसन
पहुरा समाचारदाता
धनगढी, २५ माघ । टिसरा संस्करणके मिस्टर एण्ड मिस थारु २०२१ के अडिसन माघ २८ गते धनगढीमे हुइना हुइल बा ।
वाइएसी इभेन्ट्सके सहकार्यमे जह इन्टरटेनमेन्टसे आयोजित इ प्रतियोगिताके पहिल चरणमे इहे माघ २८ गते धनगढी स्थित थारु छात्रबासमे, सुनसरीके झुम्का स्थित सोउर म्युजिक प्रोडक्सन, सिराहाके लहानस्थित अर्किड क्याफे, पर्साके वीरगञ्ज स्थित होटल ओम रेसिडेन्सी रेष्टुरेन्ट एण्ड बारमे अडिसन हुइना जनाइल बा ।
ओस्टके फागुन १ गते काठमाण्डौंके अनामनथरस्थित युनियन हाउस, रुपन्देहीके बुटवल स्थित होटल द बुटवल भ्यू ओ दाङके घोराहीस्थित कविला रिसोर्टमे अडिसन हुइना प्रवन्ध निर्देशक सुरेश चौधरी जानकारी डेलै ।
पहिल चरणमे शनिच्चरके चितवनके भरतपुर, बाँकेके नेपालगञ्ज ओ मोरङके विराटनगरमे अडिसन सम्पन्न हुइल बा ।
चितवन अडिसनसे ७ जाने प्रतियोगी छनौट हुइल बाटै । छनौट हुउइयामे सोनु चौधरी, जश्मी चौधरी, जयराम खा चौधरी, अविनाश महतो, रविन चौधरी, निवेश चौधरी ओ पवित्रा कुमारी रहल बाटै । ओस्टके विराटनगरसे ५ जाने प्रतियोगी छनौट हुइल बाटै ।
छनौट हुउइयामे आशकुमार चौधरी अस्मिता चौधरी, त्रिसिना चौधरी, सुजता चौधरी ओ वियक्स चौधरी रहल बाटै । ओस्टके नेपालगंजसे २ जाने सुस्मिता चौधरी ओ प्रेरणा चौधरी छनौट हुइल बाटै ।
अडिसन पश्चात छनौट हुइल प्रतिस्पर्धीहुक्रनहे काठमाण्डौंमे २५ दिनसम टमान विधामे प्रशिक्षण डेजैना बा । प्रतियोगिताके फाइनल चितवनके सौराहामे चैत्र ७ गते हुइना बा ।
प्रतियोगिताके विजेता नगद ५० हजार, फस्ट रनरअप ३० हजार, सेकेण्ड रनरअप २० हजार ओ टमान उपहार प्राप्त कैना जनाइल बा ।
