चौतर्फी दबावपाछे झाँकीहे रिहा
पहुरा समाचारदाता
धनगढी, २९ माघ । नेकपा प्रचण्ड–नेपाल पक्षके नेत्री रामकुमारी झाँक्रीहे सरकार चौतर्फी दबाबपाछे रिहा करले बा ।
बिफेक दुपहुर पक्राउ करल झाँक्रीहे साँझके उहाँक गोसिया पशुपति पुरीके जिम्मा जमानीमे रिहा करले हो । उहाँहे पक्राउ करलपाछे व्यापक विरोध हुइल रहे । राष्ट्रपतिविरुद्ध अशोभनीय अभिव्यक्ति डेहल अभियोगमे प्रहरी उहाँहे पक्राउ करल रहे । झाँक्री संविधानसे अभिव्यक्ति स्वन्त्रता डेहल ओरसे अपने राष्ट्रपतिके आलोचना करटी भाषण करल बटैले रहिट ।
ओस्टेक करके विफेक रोज धनगढीमे झाँक्रीहे रिहाईके माग करटी नेकपा प्रचण्ड–नेपाल पक्षके राष्ट्रिय यूवा संघ विरोध प्रदर्शन करले बा । विरोध प्रदर्शनपाछे धनगढीके एलएन चोकमे हुइल कोणसभामे राष्ट्रिय यूवा संघके केन्द्रीय सदस्य दिपक सिंह नेत्री रामकुमारी झाँक्रीहे पक्राउके विरोध प्रदर्शन करल जनैलै । प्रतिगामी सरकार झाँक्रीहे रिहा नइकरलेसे देशव्यापी आन्दोलन कैना चेतावनी डेहल रहिट ।
