बघुवा झपोटलपाछे एक जाने घाहिल

पहुरा समाचारदाता
हसुलिया, ३० माघ । कैलालीके कैलारी गाउँपालिका–८ स्थित दुधियाके बनुवामे बाघुवा झम्टलपाछे एकजाने गम्भीर घाहिल हुइल बाटै ।

शुक सकारे करिब ७ बजेओर दुधियाके दुर्गा चौधरीहे बघुवा झम्टल रहे । सडकमे नेंग्टी रहल बेला उहाँहे बघुवा झपोटके बन्वाक भिट्टर लैगिल रहे । स्थानीयके अनुसार यात्रु बोकके बनकन्द्र ओर जैटी रहल अटो चालक ओ ओम्नेक यात्रु बघुवा मनैयाहे झम्टट् डेखलपाछे दुधियावासीहे बोलाइल रहिट । गाउँवासी पुगेबर घाहिलहे अगोरके बघुवा बैठल रहे बघुवाहे भगाके चौधरीके ज्यान बचाइल जनाइल बा ।

बघुवा चौधरीके पाछेसे पिँठ ओ कपारमे पञ्जा मारल भीष्म चौधरी जानकारी डेलै । दुधियासे बनकन्द्र ओर जैना डगरामे पाँच मिनेट जट्रा जंग्लाट क्षेत्र परठ् । बघुवाके आक्रमणमे परल गम्भीर चौधरीके उदासीपुर प्राथमिक स्वास्थ्य केन्द्रमे उपचार हुइ नैसेकलपाछे थप उपचारके लाग नेपालगञ्ज रिफर करल बा । स्थानीय चौधरीहे आक्रमण करुइया पाटेबाघ रहल जनाइल बा ।

डिभिजन वन कार्यालय कैलालीके प्रमुख रामचन्द्र कँडेल भर्खर आपनहे फेन जानकारी प्राप्त हुइल बटैलै । ‘आब बघुवाहे नियन्त्रण कैना वा का कैना बारे उप्पर निकायमे छलफल हुइटी रहल बा’, उहाँ कहलै ।