प्रदेश लिगमे निसर्ग स्टार सिटी विजयी
पहुरा समाचारदाता
धनगढी, ३० माघ । सुदूरपश्चिम प्रदेश लिग अन्तर्गतके पहिल खेलमे निसर्ग स्टार सिटी युवा क्लब विजयी हुइल बा ।
अखिल नेपाल फुटबल संघके कार्यक्रम अन्तर्गत सुदूरपश्चिम प्रदेश फुटबल संघके आयोजनामे कैलाली ओ कञ्चनपुरके जिल्ला च्याम्पियन टोली बीच प्रदेश लिगके महेन्द्रनगरमे हुइल खेलमे स्टार सिटी ३–२ से विजयी हुइल हो ।
एन्फा अन्तर्गत आबद्ध रहल कैलालीके जिल्ला च्याम्पियन निसर्ग स्टार सिटी युवा क्लब कञ्चनपुर जिल्लाके च्याम्पियन दीपज्योती युवा क्लबहे पहिल खेलमे पराजित करल हो । स्टार सिटीके जितमे चेतमान कठायत दुई तथा कप्तान कुवेर सिंह एक गोल करल रहिट ।
चेतमान पहिल हाफके ५ मिनेट ओ ४३ औं मिनेटमे गोल करल रहिट कलेसे कुवेर पहिल हाफके ३९ औं मिनेटमे गोल करल रहिट । पहिल हाफमे ३–० के अग्रता लेहल स्टार सिटी डुसरा हाफमे गोल करे नैसेकके दुई गोल भर खाइल रहे । दीपज्योतीके लाग शुभम चन्द डुसरा हाफके ५७ औं ओ धिरेन्द्र शाह ६४ औं मिनेटमे गोल करल रहिट ।
डुनु टोली शनिच्चरके डुसरा खेल धनगढीके जुगेडामे खेल्ना बाटै । लिगके पहिल खेलमे जित हात पारल स्टार सिटी आब डुसरा खेलमे जित हात पारके बराबरी करलमे सिधे प्रेसिडेन्ट कपके लाग छनोट हुइना बा । दीपज्योती भर आघे बह्रक लाग स्पष्ट जितसहित गोल अन्तरके आवश्यकता पर्ना बा । स्टार सिटी अवे खेल जितेबर दीपज्योतीसे होम खेल गुमाइल हो ।
सुदूरपश्चिम प्रदेश लिग विजेता टोली देशके सातु प्रदेशके विजेताहुक्रनके बिचमे हुइना प्रेसिडेन्ट कप खेल्ना बा । ओम्ने उत्कृष्ट चारमे पर्ना सफल हुइलमे चार प्रदेश राष्ट्रिय लिगमे सहभागिता जनैना बाटै । सहिद स्मारक ए डिभिजन लिगके उत्कृष्ट ६ ओ प्रेसिडेन्डट कपके उत्कृष्ट चार कैके १० क्लबसे राष्ट्रिय लिगमे सहभागिता जनैना बा एन्फा जनैले बा ।
