अध्यक्ष कप रनिङ्गमे ३ खेल सम्पन्न

पहुरा समाचारदाता
हसुलिया, ३० माघ । कैलारी गाउँपालिका–३ स्थित उत्तर भडरीमे हुइटीरहल तेसर अध्यक्ष कप रनिङ्ग खेलकुद प्रतियोगिता अन्तर्गत शुकके रोज ३ खेल हुइल बा ।

पहिल खेल पुरुषओर वडा नम्बर १ ओ वडा नम्बर ७ बिच हुइल रहे । उ खेलके वडा नम्बर १ विजयी हुइल बा । निर्धारित समयमे १/१ गोल बराबरीमे पुगल टीम पेनाल्टीमे ३–४ से वडा नम्बर १ विजयी हुइल बा । वडा नम्बर १ के शेरबहादुर चौधरी, राहुल चौधरी, शंकर चौधरी, सुरज चौधरी गोल करलैं कलेसे वडा नम्बर ७ के अजय चौधरी, मंगल चौधरी ओ रामजनम चौधरी गोल करलैं ।

ओस्टेक महिलाओर हुइल खेलमे कैलारी गाउँपालिकाके टीमहे वडा नम्बर ५ के टीम वाकओभर मरटी विजयी हुइल बा ।

महिलाओरके औरे खेलमे वडा नम्बर ९ वडा नम्बर ६ हे २–१ गोल अन्तरसे पराजित करले बा । वडा नम्बर ९ के करुणा चौधरी ओ दीपा चौधरी एक/एक गोल करलैं कलेसे वडा नम्बर ६ के रञ्जिता चौधरी गोल करली ।

प्रतियोगितामे नौ वडा ओ कैलारी गाउँपालिकाके कार्यालयके करके पुरुष÷महिलाके १०/१० टीमके सहभागिता रहल प्रतियोगिताके मिडिया संयोजक मिसन चौधरी जानकारी डेलैं ।

कैलारी गाउँपालिका कार्यालयके सहयोगमे कैलारी स्मार्ट समन्वय युवा क्लबसे प्रतियोगिताके आयोजना करल हो ।