‘संचारक्षेत्रमे निष्पक्षता आवश्यक’
पहुरा समाचारदाता
धनगढी, ३० माघ । सुदूरपश्चिम प्रदेशके मुख्यमन्त्री त्रिलोचन भट्ट संचारक्षेत्रमे निष्पक्षता अनिवार्य रहल बटैले बटै ।
शुकके रोज गोदावरी नगरपालिकाके गोदावरीमे नेपाल पत्रकार महासंघ सुदूरपश्चिम प्रदेश समितिके दुसरा साधारणसभामे बोल्टी उहाँ संचारक्षेत्र समाजके ऐन रहल ओरसे निष्पक्षता अनिवार्य रहल बटाइल रहिट । मुलुकमे नइसोचल, जनता नइचाहल घटना देशमे हुइल ओरसे व्यवस्था जोगैना आवश्यक रहल बटैलै ।
‘बर्षौसे प्राप्त संविधानसभा, संविधानसभासे डेहल संविधान ओ संविधानसे डेहल अधिकार कुल्चना काम हुइल बा,’ मुख्यमन्त्री भट्ट कहलै, ‘संविधानके एक ठो धारा मिच्लेसे संविधान मिच्टी जाई, उहीहे जोगाइक लाग संचारमाध्यमके अहम भूमिका बा ।’ संविधान स्वतन्त्र रुपमे बोले पैना अधिकार डेहल मने बोललके आधारमे व्यक्ति पक्राउ पर्ना गम्भीर विषय रहल मुख्यमन्त्री भट्ट बटैलै ।
आन्तरिक मामिला तथा कानून मन्त्री प्रकाशबहादुर शाह तथ्यमे आधारित सत्यता बाहेर नाने पर्नामे जोड डेहल रहिट । उहाँ कहलै, राजहाँसहे दुधपानी मिलाके डरलेसे दुध सक्कु खाके पानी केल बचाइठ, संचारकर्मीफे राजहाँस बन्के काम करे परल । प्रहरी प्रशासन प्रदेश सरकार मतहतमे आई पर्ना हो, मने आइनइसेकल कारण अनुसन्धानमे प्रदेश सरकार कुछ करे नइसेकल बटैलै ।
सुदूरपश्चिम प्रदेशसभाके प्रमुख प्रतिपक्षि दल नेपाली काँग्रेस संसदीय दलके नेता डा. रणबहादुर रावल नेकपाके दुनु समुहसे असवैधानिक काम हुइटी रहल बटैलै । संचारजगत कानूनी अर्चनहे सहके आघे बह्रटी जनैलै । उहाँ कहलै, नेपाली जनता भोट डेहे सत्तामे पठाइल मने, वर्तमान सरकार नइविस्रैना चोट डेले बा ।
नेपाल पत्रकार महासंघके पूर्व अध्यक्ष तथा वरिष्ठ पत्रकार शिव गाउँले सोसल मिडियाके कारण नेपाली पत्रकारिता धारापमे परटी गैल बटैले बटै । सोसल मिडिया आइलपाछे चुनौती ठप्टी गैलपाछे पत्रपत्रिका बन्द हुइना अवस्था आइसेक्ना ओरसे आब व्यावसायिक पत्रकारिता कैना आवश्यक रहल उहाँ बटैलै ।
कार्यक्रममे नेपाल पत्रकार महासंघके केन्द्रीय सदस्य मीन बम, सृजना आर्याल, लाल ऐरी, उत्तर विष्ट, अग्रज पत्रकार डिआर पन्त, चित्राङ थापा, मनमोहन स्वाँर, प्रेस संगठनके प्रदेश संयोजक रामसिंह ठगुन्ना, इन्सेक प्रदेश संयोजक खडकराज जोशी, नेपाल पत्रकार महासंघ कैलाली शाखा अध्यक्ष जगत साउँद, वानके प्रदेश अध्यक्ष ज्ञानेन्द्र महता ओ पत्रकार दुर्गा उपाध्याय लगायत मन्तव्य व्यक्त करल रहिट ।
नेपाल पत्रकार महासंघ सुदूरपश्चिम प्रदेश समितिके अध्यक्ष अर्जुन शाहके अध्यक्षतामे हुइल कार्यक्रमके संचालन महासचिव योगेश रावल ओ स्वागत मन्तव्य उपाध्यक्ष चाँदनी आचार्य करले रहिट ।
पहुरा दैनिक सहित पत्रकार सम्मानित
नेपाल पत्रकार महासंघ सुदूरपश्चिम प्रदेश समितिके दुसरा साधारणसभामे पहुरा थारु दैनिक लगायत पत्रकारहुकन सम्मान कैगिल बा ।
टमान कठिनाईके बावजुत सुदूरपश्चिममे नम्मा समयसे थारु भाषाके एक ठो केल थारु दैनिक पत्रिका संचालन करके भाषिक उन्नयनमे योगदान करल कहटी प्रशंसापत्र सहित सम्मान करल हो । पहुरा थारु दैनिक विगत १८ बरससे प्रकाशित हुइटी आइल नेपाल प्रेस काउन्सिलमे आठ बरससे ‘क’ वर्गमे परटी आइल बा ।
ओस्टेक सम्मानित हुइल पत्रकारमे कञ्चनपुरके रामबहादुर चन्दहे सुदूरपश्चिम पत्रकारिता तारा सम्मान पुरस्कार, कञ्चनपुरके चित्रांग थापा ओ कैलालीके मनमोहन स्वाँरहे अग्रज पत्रकारिता सम्मान, डडेल्धुराके डिआर पन्तहे लिलानाथ ओझा स्मृति पत्रकारिता पुरस्कार, बझांगके बसन्तप्रताप सिंहहे कर्ण बोहरा स्मृति पत्रकारिता पुरस्कार, बाजुराके प्रकाशबहादुर सिंहहे जेपी जोशी पत्रकारिता पुरस्कार, डोटीके खगेन्द्रबहादुर सिंह, कैलालीके उन्नती चौधरी ओ दार्चुलाके मनोज बडूहे जयपृथ्वी बहादुर सिंह पत्रकारिता पुरस्कार, कञ्चनपुरके दुर्गा उपाध्याय, बैतडीके तृप्ती शाही ओ अछामके गीता कुँवरहे केआई सिंह पत्रकारिता पुरस्कारसे सम्मानित कैगिल बा ।
ओस्टेक करके नेपाल पत्रकार महासंघ सुदूरपश्चिम प्रदेशके नौ शाखा मन्से दार्चुला शाखाहे सम्मान कैगिल बा ।
