कैलाली अस्पतालसे मुटुरोग सेवा सुरु
पहुरा समाचारदाता
धनगढी, १ फागुन । धनगढी उपमहानगरपालिका वडा नं १ पशुपति टोल स्थित कैलाली अस्पतालसे मुटुरोग सेवा विस्तार करले बा ।
शनिच्चरके पत्रकार सम्मेलन करटी अस्पतालके सञ्चालक जनकराज जोशी उ सेवा विस्तार करल जनाइल हुइट । कन्सल्टेन्ट मुटुरोग विशेषज्ञ डा. राजेश पंजीयारसे अस्पताल दैनिक रुपमे मुटुरोग विशेषज्ञ सेवा डेना जनैले बा ।
एमडी, डीएम (कार्डियोलोजी) केयूएसएमएस डा. पंजीयार विगत तीन बरससे बी एण्ड सी मेडिकल कलेज झापामे सेवा डेटी आइल रहिट । उहाँ आइलपाछे मुटुरोगके विमारी रहल सेवाग्राही सर्वसुलभ रुपमे उ सेवा पैना सञ्चालक जोशी बटैलै ।
एक महिन आघे अस्पतालसे स्पाइनल सर्जरी सेवा फेन विस्तार करले रहे । स्पाइन सेवा विस्तार संगे यी रोगसे पीडित सेवाग्राही अपने ठाउँमे सस्ता ओ सर्वसुलभ सेवा लेहे पाइल बाटै ।
स्पाइन सर्जरीके लाग अस्पतालसे डा. ज्ञानेन्द्र जोशीसे सेवा डेना जनाइल बा । डा. जोशी अर्थोपेडिक सर्जन हुइट कलेसे उहाँ स्पाइन सर्जरीमे यूएससे फेलोसिप करले बाटै ।
