अध्यक्ष कप प्रतियोगिताः वडा नम्बर ५, २ ओ ७ विजयी
पहुरा समाचारदाता
हसुलिया, १ माघ । कैलालीके कैलारी गाउँपालिका–३ स्थित उत्तर भडरीमे जारी टिसरा अध्यक्ष कप रनिङ्ग खेलकुद प्रतियोगिता अन्तर्गत शनिच्चरके ३ खेल हुइल बा ।
पहिल खेल महिला ओर वडा नम्बर २ ओ वडा नम्बर ८ बिच हुइना रलेसे फेन वडा नम्बर ८ के खेलाडी अनुपस्थित हुइल पाछे वाकओभर मरटी वडा नम्बर २ विजयी हुइल बा ।
ओस्टके डुसरा खेल वडा नम्बर १ ओ वडा नम्बर ७ बिच हुइल रहे । वडा नम्बर ७ से शुन्यके विरुद्ध १ गोल कैटी जित हात पारल हो । वडा नम्बर ७ के खेलाडी बासमति चौधरी १ गोल कैके टीमहे जित डेहुवाइल रही ।
ओस्टके पुरुष ओर वडा नम्बर ४ ओ वडा नम्बर ५ बिच हुइल प्रतियोगितामे वडा नम्बर ५ जित हाठ परले बा । निर्धारित समयमे १/१ गोल कैटी बराबरी हुइल खेल पेनाल्टीमे वडा नम्बर ३ के विरुद्ध ५ गोल कैटी जीत हात पारल हो ।
वडा नम्बर ५ के जोसेप चौधरी, निराजन चौधरी, रमेश चौधरी, आदित्य चौधरी, अविष्कार चौधरी गोल करल रहिट कलेसे वडा नम्बर ४ के गोविन्द विक, सुरज विक ओ मोहन सिके १/१ गोल करल रहिट ।
फुटलबल प्रतियोगितामे नौ वडा ओ कैलारी गाउँपालिकाके कार्यालयके पुरुष/महिलाके १०/१० ठो टीमके सहभागिता रहल बा । काल्ह फागुन २ गतेसे पुरुष ओर सेमी फाइनल खेल हुइना प्रतियोगिताके मिडिया संयोजक मिसन चौधरी जानकारी डेलै ।
कैलारी गाउँपालिका कार्यालयके सहयोगमे कैलारी स्मार्ट समन्वय युवा क्लब प्रतियोगिताके आयोजना करल हो ।
