‘थारुन उपर सरकारके दास मानसिकता’
पहुरा समाचारदाता
धनगढी, २ फागुन । आपन हक अधिकारके माग करेबर सरकारसे जेलमे कोच्नाके साथे दासत्व मानसिकताके साथ जन्जिर लगाके उपचारमे पठैना कलक सक्कु थारुहे दासता लाडल एक कार्यक्रममे सहभागी थारु अगुवाहुक्रे बटैले बाटै ।
शनिच्चरके घनगढीमे हुइल थरुहट थारुवान राष्ट्रिय मोर्चाके अन्तरक्रिया कार्यक्रममे उहाँहुक्रे ओइसीन बटाइल हुइट । टीकापुर घटनापाछे सांसद रेशम चौधरी जेल भिट्टर गम्भिर विरामी हुइलेसे फेन राज्य पक्षसे उहाँहे दास मानसिकताके साथ जन्जिर लगाके उपचार करल प्रसंगहे लेके थारु अगुवा ठाकुर करियाप्रधान राज्यके दास मानसिकता रहल औंल्याइलै ।
‘राज्यसे हमारउपर सक्कु क्षेत्र जस्टे कृषि, स्वाथ्य, शिक्षा लगायतके ठाउँमे दासत्व लड्ले बा । जब जब किसानहे मल चाहठ्, उ बेला अभाव रहठ् ओ किसान महंगामे मल किन्ना बाध्य हुइना उ फेन दासत्व हो ।’
ओस्टके राना थारु समुदायके अगुवा विद्दु राना यहाँके सासकहुक्रे टमान प्रलोभनमे पारके राना थारुहुक्रनके जग्गा सक्कु हडप सेकल बटैलै । राज्यसे रानाथारुहे लोप बनैना रणनीतिके साथ हमार उपर दासत्व लाडल उहाँके तर्क रहे ।
ओस्टके थारु महिला सभाके जिल्ला अध्यक्ष दुर्गा कुश्मी थारु महिला आबके आन्दोलनके शक्ति रहल बटैली । उहाँ महिलाहुक्रे व्यवस्थापकिय जिम्मेवारी किल नैहोके नेतृत्वके जिम्मा निर्वाह कैना फेन तयार रहल बटैली ।
अन्तरक्रिया कार्यक्रममे इहे फागुन १५ ओ १६ गते हुइना समानता न्याय ओ अधिकारके लाग थरुहट थारुवान विशेष सम्मेलनहे सफल पारक लाग धनगढी उपमहानगरपालिकामे तयारी समिति फेन गठन हुइल बा ।
नगर स्तरिय कमितिके संयोजक गोठु चौधरी, सहसंयोजक लप्टेन चौधरी, सदस्य सचिवमे रामनारायण चौधरी रहल बाटै । ओस्टके सदस्यमे क्रमशः रिञ्जन चौधरी, कुलबीर चौधरी, जगदिश चौधरी, रामबहादुर चौधरी, झरिलाल चौधरी, गोली बहादुर चौधरी, जयराम चौधरी, महेश चौधरी ओ विद्धु राना रहल बाटै ।
अन्तरक्रिया कार्यक्रममे पूर्व सांसद कृष्णाकुमार चौधरी, मोर्चाके जिल्ला संयोजक माधव थारु, थारु अगुवा प्रभातकुमार चौधरी लगायतके उपस्थिति रहल रहे ।
