नेपाल महिला संघसे धनगढीमे प्रदर्शन

पहुरा समाचारदाता
धनगढी, १ फागुन । बलात्कारपाछे हत्या करल बैतडीके १७ बरसके भागरथी भट्टके न्यायके माग करटी नेपाल महिला संघसे धनगढीमे प्रदर्शन करले बा ।

बलात्कार पाछे हत्या हुइल १० दिन बिटलेसेफे अभिनसम अपराधी फेला परे नइसेकल कहटी संघसे शनिच्चर मुख्यमन्त्री कार्यालय आघे नाराबाजी सहित प्रदर्शन करल हो । विरोध सभाहे सम्बोधन करटी महिला संघ पूर्व अध्यक्ष तथा नेपाली का“ग्रेस केन्द्रीय सदस्य डा.डिला संग्रौला असक्षम प्रधानमन्त्री ओ गृहमन्त्रीसे राजीनामा डेहे पर्ना बटैली । ‘घटना हुइल १० दिन बिटल’ उहाँ कहली, ‘अभिनसमके अनुसन्धानसे दोषी पहिचान समेत करल नइहो । शव अस्पतालमे बा । परिवारजनसे पीडाउप्पर पीडा भोग्टी रहल बटै, खै कहा“ बा सरकार ?’

भागरथीके न्यायके लाग चरणबद्ध आन्दोलनके घोषणा करटी उहाँ कहली, ‘धनगढीसे आन्दोलन सुरु करके ९ जिल्लामे प्रदर्शन कैबी । सरकारसे पीडित परिवारहे न्याय डेहुवइ नइसेक्लेसे देशभर विरोध प्रदर्शन कैबी ।’

सुदूरपश्चिम प्रदेश सभा सदस्य दिव्यश्वरी शाह पीडित परिवारसे तत्काल न्याय नइपैलेसे कडा संघर्षमे उत्रन चेतावनी डेली । ‘निर्मला पन्तके हत्या हुके ओत्र आन्दोलन हुइल कुछ करे नइसेकल नइसोचि,’ उहाँ कहली, ‘भागरथी न्याय नइपाके सरकारहे सडकमे पुगैबी ।’

प्रदर्शनके क्रममे उपमहानगरपालिकाके उपप्रमुख सुशीला मिश्र भट्ट हिंसा ओ बलात्कारके घटना बढटी गैलसंगे छाई जन्माई छोरना स्थिति सिर्जना हुसेकल बटैली । ‘गाउ“घरमे छाइ सुरक्षित नइहुइट,’ उहाँ कहली, ‘का अव छाई जन्माई छोरे पर्ना हो ? घटना हुइल दुई साता बिटलेसेफे खै अपराधी पत्ता लगाई सेकल यी देशमे न्याय नइहो ?’

महिला संघसे विरोध कार्यक्रम अन्तर्गत १ गते धनगढी, ३ गते दार्चुला, ४ गते बैतडी, ६ गते बझाङ, ७ गते डडेल्धुरा, ८ गते डोटी, ९ गते अछाम, १० गते बाजुरा ओ १२ गते कञ्चनपुरमे विरोध कैना कार्यक्रम रहल जनाइल बा ।

‘दोषी पक्राउ नइहुइटसम संघर्ष जारी’

नेपाली कांग्रेसके केन्द्रीय सदस्य डिला संग्रौला बैतडी दोगडाकेदार गाउँपालिका–७, चडेपानीके १७ वर्षिया लउण्डी भागरथी भट्टके हत्यामे संलग्नहुकन कानूनी दायरामे नानके हदैसमके कारवाही कैना सरकारसे माग करले बटी ।

नेपाल प्रेस युनियन कैलालीके आयोजानामे शनिच्चरके रोज धनगढीमे हुइल पत्रकार सम्मेलनमे हत्यामे संलग्नहे कडा कारबाहीके लाग प्रधानमन्त्रीसे तुरुन्त निर्देशन जारी कैनाफे उहाँ माग करल रहिट । हत्यामे संलग्नहे पत्ता लगाई नइसेक्ना हो कलेसे गृहमन्त्री रामबहादुर थापा (बादल) राजीनामे डेहे पर्ना उहाँ कहली ।

‘देशमे राजनैतिक संकट गहिर हुइटी जाके समाजमे बलात्कार पश्चात् हत्याके घटनाक्रम बढटी जैनासे देशमे शान्ति सुरक्षा ओ नागरिकके जनधनके सुरक्षा कैना सरकारके दायित्व उदाङगल बा, उहाँ कहली– ‘घटना घटल अटरा दिन विटलेसेफे दोषीहे पक्राउ करे नइसेकल ओरसे सरकारप्रति गम्भिर प्रश्न उब्जल बा ।’

निर्मला पन्त लगायतके बलात्कारके घटनाहे सरकारसे आजसमफे कानूनी दायरामे नानके न्याय डेहे नइसेकल वर्तमान अवस्थामे कहु सरकारसे दोषीहे संरक्षण करटी टे नइबा ? कहिके आम नागरिकसे आशंका व्यक्त करल केन्द्रीय सदस्य संग्रौलाके कहाई बा ।

उहाँ कहली, ‘भागरथी भट्टके बलात्कारपाछे हत्यामे संलग्न व्यक्तिहुकनहे पक्राउ करके अनुसन्धानके दायरामे नइनानटसम हमार संघर्ष जारी रही । यी घटनाके बारेमे प्रधानमन्त्रीसे आम नागरिकके चासो ओ चिन्ताहे सम्बोधन करके संवन्धित निकायहे तुरुन्ते कडासे कडा कारवाहीके लाग निर्देशन डेहे परल ।’

पत्रकार सम्मेलनमे नेतृ संग्रौला सुदूरपश्चिम सरकारसे तदारुकताके साथ उच्चस्तरीय छानविन समिति गठन करके दोषी पत्ता लगैना कार्यमे कदम चाले पर्नाफे बटैले बटी ।